ВО ОДБРАНА НА ДЕМОКРАТИЈАТА (2)
ВО ОДБРАНА НА ДЕМОКРАТИЈАТА (2)
Лаици и професионалци
Демократската држава е сложен механизам кој може соодветно да функционира единствено доколку се почитуваат однапред поставените правила на делување.
Во демократската држава, политичарите се лаици кои застапуваат одредена развојна линија која, во идеални услови, би требало да ги претставува искажаните желби на избирачите кои стојат зад нивното постапување, кои би требало да ги претставуваат генералните потреби и интереси на граѓаните и кои во рамките на законодавната и извршната власт ќе ја презентираат структурата на населението.
Заради ова, за политичарите (дури и оние на највисоките функции) воопшто не се бара посебна стручност, образование, искуство или било кој друг вид на квалификации. Секој полнолетен граѓанин на Македонија кому не му е одземена или ограничена деловната способност, може да биде пратеник, министер, премиер, претседател на државата. Нивна задача е што е можно поверно да ги претстават граѓаните во процесите на донесување и спроведување на одлуките во државата.
Вака лаички поставената владејачка структура може да опстојува и да ја предводи државата единствено доколку зад неа стои стручен апарат, администрација составена од професионалци со знаење, искуство, вештини. Администрацијата е таа која ги претвора идеите и политиките во остварливи активности, која ги преработува информациите до ниво разбирливо за политичарите -лаици и ги врамува намерите во закони и норми.
Со изборот за пратеник, министер, премиер, претседател на државата, не се стекнува образование и не се станува професионалец. Изборот за пратеник, министер, премиер, претседател на државата не може да го замени факултетското образование, стручноста изградена во рамките на работењето во конкретна област, ниту пак кариерното стекнување на искуството.
Во моментот кога како администратор во конкретно министерство се поставува човек кој нема појма од областа која е предмет на работење на тоа министрество, пропаѓа целокупната демократска машинерија, односно, таа се претвора во кулиси кои личат на реалноста меѓутоа немаат врска со реалноста.
Во моментот кога членувањето во управните одбори каде што, според закон, треба да бидат поставени афирмирани и познати стручњаци во областа на предметот на работењето на јавното претпријатие, станува награда за партиска активност, пропаѓа претпријатието.
Во моментот кога наместо највисоката администраторска функција – амбасадор, се поставува партиски војник кој добро лепел плакати, пропаѓа целокупната надворешна политика на државата.
Во моментот кога се распишува конкурс за вработување во органите на државата без да се знае што ќе работи новиот администратор, пропаѓа државата.
Демократската држава е многу сложен механизам. Во тој механизам, политичарите седат зад воланот, меѓутоа државата може да се придвижи само ако постои машинерија која беспрекорно ќе работи зад тој волан. Секој партиски војник вработен во државата ја уништува оваа машинерија и сите нас граѓаните не доведува во смртна опасност.
Преземање на содржините e ЗАБРАНЕТО ВО ЦЕЛОСТ, освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
Илустрација во прилог: Џ. Дерала
