По неколкудневна потрага, тројца од четворицата американски војници исчезнати во Литванија се пронајдени мртви. Продолжува потрагата по четвртиот војник во воениот полигон Пабраде, соопшти американската армија. Истрага за причините за несреќата започнаа и американските вооружени сили и литванските власти. Спасувачките екипи претходно од мочуриште успеале да го извлечат тенкот во кој биле исчезнатите, тежок неколку тони. Четворицата војници се водат како исчезнати од минатиот вторник (25 март, 2025). Според американски извори, тие извршувале тактичка обука тој ден, пренесува Дојче Веле.
„Тажен ден за цела Литванија“
Литванскиот министер за одбрана Довиле Сакалиен зборуваше за „болна загуба“ и „многу тажен ден за цела Литванија“. „Можеме да ве увериме дека нема да мируваме додека не го пронајдеме последниот исчезнат војник“, напиша таа на платформата Х. Претседателот Гитанас Наузеда и министерот за надворешни работи Кестутис Будрис, исто така, изразија сочувство до семејствата на војниците.
Стејт департмент на САД во Вашингтон порача дека е во шок поради смртта на тројцата војници, изрази сочувство до нивните семејства и им се заблагодари на службите за итни случаи за неколкудневната операција за пребарување.
Мочуришната област беше исушена
Кога војниците не се вратија од вежбата во вторникот, литванската војска и полиција заедно со американската војска започнаа операција за пребарување. Во операцијата учествуваа стотици војници и спасувачи. Ова на крајот доведе до локацијата на тенкот „М88 Херкулес“ во мочуришна област на полигонот за обука. За да стигнат до тенкот, кој беше потопен речиси пет метри длабоко и под водената линија, спасувачите мораа да ја исушат мочуришната површина на локацијата. Со денови беа испумпувани вода и кал и пото со чакал и песок беше стабилизирано мочурливото тло околу локацијата на тенкот. По пронаоѓањето на возилото тешко 70 тони во понеделникот вечерта, литванските власти првично не дадоа никакви информации дали се пронајдени војниците. Пабраде се наоѓа на источното крило на НАТО, недалеку од границата со Белорусија. Сочувството во Литванија е високо: Во катедралата во Вилнус во неделата имаше заедничка молитва за исчезнатите војници.
