Министерот за правда Бојан Маричиќ денес во Брисел се сретна со потпретседателката на Европската комисија за транспарентност и вредности Вера Јурова. На средбата се разговараше за реформите во Северна Македонија со фокус на оние во правосудството, владеењето на правото, но и за европските интеграции на земјата.
Маричиќ на средбата кажа дека владеењето на правото е основа за развој на сите држави, па затоа и земјите кандидатки за членство во унијата треба да бидат вклучени во постојниот механизам за владеење на правото во земјите членки на ЕУ.
Маричиќ на Јурова и ја пренел одлучноста на Влада да продолжи со европската агенда и дека земјава со засилено темпо ќе продолжи да ги спроведува реформите со цел носење на европските стандарди дома, а тоа е и главната причина за носењето и спроведувањето на планот „Европа дома“.
Министерот за правда на потпретседателката на Европската комисија и го образложи и планот за дигитализација на македонското судство на кое Министерството за правда работи интензивно. Според Маричиќ дигитализацијата и онлајн судењата ќе обезбедат побрзи постапки и континуитет на истите.
