Премиерот Христијан Мицкоски предложи реконструкција на Владата. Процесот опфаќа кадровски промени во повеќе министерства, структурни измени во извршната власт и вклучување на Демократската партија на Турците (ДПТ) во владејачкото мнозинство кое го сочинуваат ВМРО-ДПМНЕ, Вреди и ЗНАМ.
📺 Видео: Следете го делот поврзан со реконструкцијата на Владата (започнува на 08:17)
Структурни промени
Со реконструкцијата се укинува функцијата вицепремиер за добро владеење, а нејзините досегашни надлежности се префрлаат под директна ингеренција на кабинетот на премиерот. Бројот на министерства останува ист, но владиниот кабинет ќе функционира со двајца вицепремиери помалку.
Нови кадровски решенија
Промените опфаќаат рокади во неколку клучни сектори, при што ВМРО-ДПМНЕ го презема раководењето со здравствениот и социјалниот сектор. Предложени се следните кадровски решенија:
- Сашо Клековски – предложен за министер за здравство (досегашен директор на ФЗО).
- Ѓоко Велковски – предложен за министер за социјална политика, демографија и млади.
- Златко Перински – преминува на чело на ФЗО (досегашен министер за локална самоуправа).
- Иван Стоилковиќ – предложен за министер за локална самоуправа.
- Ерџан Демир – предложен за министер без ресор задолжен за интеграција на Ромите.
Во рамките на коалициските партнери, коалицијата Вреди го презема раководењето со министерствата за правда, за култура и туризам и за односи меѓу заедниците. Партијата ЗНАМ го добива Министерството за земјоделство, шумарство и водостопанство, за каде е предложен Борче Серафимовски.
Реакции и собраниска процедура
Опозициската СДСМ ја оцени реконструкцијата како промена која служи исклучиво за задоволување на партиски интереси, додека ДУИ упати критики кон коалицијата Вреди, доведувајќи ја во прашање нивната позиција во Владата.
Предлог-составот на реконструираната Влада е најавено да биде доставен до Собранието на 3 јули 2026 година.
Паралелно со владините промени, ВМРО-ДПМНЕ спроведе и промени во партиските структури. Марија Митева е избрана за претседателка на Унијата на жени, додека Тодор Коневски е нов претседател на Унијата на млади сили.
Д. М.
Во ера на дезинформации, националистички популизам и авторитаризам, неопходна е вашата поддршка за ЦИВИЛ
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА
