И покрај тоа што вината се префрла надвор, политиките и реториката на Владата предводена од Мицкоски ја оддалечуваат земјата од Европската Унија, оценуваат домашни и странски политичари.
„Македонија сама си го блокира патот кон Европската Унија затоа што не сака да ги исполни критериумите за членство,“ изјави бугарскиот претседател Румен Радев, кој од Загреб порача дека Бугарија не поставува нови услови, туку бара почитување на веќе договореното.
– Сè уште чекаме Република Северна Македонија да исполни еден јасно напишан услов – вклучување на Бугарите во уставот. Тоа би ја отворило вратата за преговори,“ рече Радев, додавајќи дека „нема нови услови, бараме само да се исполни договореното“.
Слични тврдења изнесе и хрватскиот претседател Зоран Милановиќ, кој оцени дека „е дрска навреда кон земји како Црна Гора и Северна Македонија да се каже дека Украина е поблиску до членство во ЕУ“.
Извршниот директор на ЕВРОТИНК, Димитар Николовски, во изјава за „Фронтлајн“ истакна дека Владата се ставила себе си во невозможна позиција со односот кон францускиот предлог, кој го третира како национално предавство.
– Владата се стави себеси во невозможна ситуација со третирањето на францускиот предлог како национално предавство. Тоа е позиција од која е тешко да се излезе. Сега се соочуваат со тотално неразбирање од страна на европските институции и единствениот пат кој можат да го фатат е да глумат дека се конструктивни. Можеби навистина сакаат да напредуваме во евроинтеграциите, но ваквата состојба повеќе им одговара за одржување на власт , истакна Николовски.
Премиерот Христијан Мицкоски од Охрид порача дека Бугарија ѝ прави на Македонија „истото што Русија ѝ го прави на Украина“, обвинувајќи за „обид за асимилација во 21 век“.
– Целта на Бугарија не е стотици граѓани во уставот, туку многу подлабока – тоа е обид за асимилација, рече Мицкоски.
Во меѓувреме, Министерството за надворешни работи на Македонија му врачи протестна нота на бугарскиот амбасадор, откако шефот на бугарската дипломатија го нарече Мицкоски „северномакедонски премиер“.
Од опозицијата стигнуваат уште посериозни предупредувања. Лидерот на СДСМ, Венко Филипче обвини дека „власта ја саботира европската агенда“.
– Македонскиот јазик е безбеден, идентитетот е безбеден. Но македонската интеграција во Унијата е сè подалечна поради политиките и изборите на власта, изјави Филипче.
Тој додаде дека „во една година изгубивме доверба кај стратешките партнери, а Мицкоски нема на кого да покаже со прст – ветуваше гордост, а донесе понижување“.
Според него, ВМРО-ДПМНЕ ја наследила најповолната позиција – гарантиран јазик, јасен европски пат и поддршка.
– Но ветуваа подобар договор, нова рамка, пријатели во Европа – ништо од тоа не се оствари. Жално е нивото на несвесност за последиците од овие политики. Секоја наредна одлука ја оддалечува Македонија од Унијата, подвлече тој.
Дестан Јонузи/ Фронтлајн
