Руската Федерација започна нова етапа на терор на привремено окупираните територии на Украина.
Објавувањето на таканаречената „воена состојба“ од страна на Руската Федерација има за цел да го потисне отпорот на жителите на областите Луганск, Доњецк, Запорожје и Керсон, кои се противат на руската окупација. Дури и масовната руска пропаганда не е во состојба да го прикрие неуспехот на напорите на Русија за анексија на украинските територии, се наведува во соопштението од украинското Министерство за надворешни работи.
Указот на Путин е ништовен. Тоа нема правни последици за Украина и нејзините граѓани, како и за меѓународната заедница. Наместо тоа, таквиот чекор е само уште еден пример за злосторствата на руското раководство врз украинската држава и Украинците.
И покрај агонијата на режимот во Кремљ, Украина ќе продолжи да ги ослободува окупираните територии и да го спасува својот народ.
Ги повикуваме нашите меѓународни партнери најостро да ја осудат намерата на руските окупациски администрации под превезот на таканаречената „воена состојба“ да ги лишат жителите на привремено окупираните територии на Украина дури и од основните човекови права, како и да ги осудат нивните незаконски планови за легализирање на грабежи, присилни депортации и мобилизација.
Исто така, апелираме што поскоро да и обезбедиме на Украина современи системи за противракетна и противвоздушна одбрана за да го заштитиме нашето цивилно население од варварските напади на руски ракети и беспилотни летала камикази, порачуваат од украинското МНР.
Д. Т.
