Пост на Фејсбук пласира дезинформација дека со купување на воена опрема Македонија се подготвува за војна, а на самиот пост во прашална форма пишува: „се спремаме и ние?“.
Станува збор за манипулација во самиот наслов на текстот прикажан во рамките на постот којшто во моментот на нашата рецензија има над 300 коментари и 21 споделување:
Македонија се спрема за војна? – Ќе купуваме возила и артирелиски системи.
Вистина е дека армијата ќе се поднови со возила и артирелиски системи, но чиста дезинформација е дека Македонија се подготува за војна, па затоа и купува нова воена опрема.
На 36 -та седница (05.04.2022), на предлог на Министерството за одбрана, Владата на Република Северна Македонија ја усвои Информацијата и го донесе годишниот план на Владата на Република Северна Македонија за склучување на договори за набавка на стоки, услуги и работи во областа на одбраната и безбедноста со влади на странски држави за 2022 година.
Планот содржи 8 проекти кои ќе се реализираат преку склучување на договори за набавка на стоки, услуги и работи во областа на одбраната и безбедноста со влади на земји членки на Алијансата, со кои согласно Планот за модернизација на Армијата се предвидени набавки на лесни оклопни возила на тркала (проект во континуитет), специјални возила за посебни намени, артилериски системи 105 мм и муниција 105 мм, ПВО систем на многу мали височини, ремонт на транспортни хеликоптери, опрема за извидување и разузнавање, комплет за контрола на здружен оган Joint Terminal Attack Controler (JTAC) и лесни оклопни борбени возила за специјални сили, Со наведената опрема ќе се зголеми опременоста на Армијата на Северна Македонија и нејзината интероперабилност со армиите на сојузничките земји, стои во веста поврзана со купувањето на воена опрема, а објавена на официјалната интернет страница на Владата на Р.С. Македонија.
Во врска со ова „Вистиномер“ се обрати до Владата од каде ни одговорија дека средствата за набавката на воена опрема се планирани во буџетот за одбраната за 2022 година, кој е јавно достапен и е во согласност со долгорочниот и среднорочниот план за развој на одбранбените способности.
Јавно достапна и повеќепати е повторена информацијата дека во Буџетот за одбраната за 2022 година над 30 отсто од средствата се предвидени за модернизација на Армијата. За овие 8 проекти за набавки, преку склучување на договори Влада со Влада, за оваа година се предвидени 48 милиони евра. Опцијата за склучување на договори Влада со Влада обезбедува највисока транспарентност и елиминирање на простор за корупција при склучувањето на договорите, ни одговорија од Владата.
Од сето ова можеме да заклучиме дека станува збор за наслов кој е делумно неточен. Вистина е дека армијата ќе набави воена опрема, но не е точно, како што пишува во насловот, дека Македонија се подготвува за војна, ставајќи го во контекст купувањето на воени возила и артирелиски системи.
Очигледно преку насловот од веста постирана на Фејбук, која е доста вирална, читана и коментирана , се сака да се рашири страв и паника кај населението, кое и онака е растревожено со оглед на случувањата во Украина, дека Македонија се подготвува за војна. / ВИСТИНОМЕР
