Современиот начин на живот наметнува постојано купување на нови електрични и електронски уреди, а со тоа исфрлање на старите, дотраени уреди. Од тука е потребата на граѓаните и компаниите да имаат можност да се ослободат од старите уреди кои времето и технологијата прават да имаат краток век на траење, што директно придонесе денес да се постави ЕКО ЗОНА во Општина Центар, и тоа во срцето на општината во Градски Трговски Центар.
„Електричниот и електронскиот отпад делуваат како нетоксичен отпад, но нивното несоодветно третирање, уништување и депонирање доведува до испуштање на тешки метали во воздухот, водата и почвата, кои што сериозно делуваат на здравјето на граѓаните и воопшто на квалитетот на животната средина. За таа цел организиравме систем за собирање на отпадот од домовите и компаниите, преку акција во сите урбани заедници“, истакнуваат организаторите.
Ова е континуиран проект, кој ќе се спроведува на територијата на Општина Центар, во соработка со урбаните заедници и колективен постапувач Нула Отпад од Скопје.
Граѓаните и компаниите се пријавуваат кај Координаторите, наведувајќи каков тип и колку отпад поседуваат, по што колективниот постапувач, Нула Отпад ДОО Скопје, согласно списоците за евиденција за секоја урбана заедница, организира подигнување на отпадот, директно од домовите и компаниите на граѓаните… Отпадот, понатаму безбедно се пренесува до фирма рециклатор, за понатамошна постапка.
„Во блиска иднина се планира во сите институции кои се на територија на Општина Центар да поставиме и садови кои се наменети за отпадни батерии, а со тоа да ја реализираме целта, здрава животна средина и здрав живот кој е основно право на секој жител на Република Македонија“, додаваат тие.
Д.М.
