„Во Македонија речиси нема отпор на корупција, а тоа значи доколку некој побара – граѓаните даваат поткуп, односно не ја пријавуваат корупцијата. Над 90 проценти коишто учествуваа во коруптивни активности, односно на тие кои им бил побаран поткуп не пријавуваат“, вели Емина Нурединоска од МЦМС, во разговор за ЦИВИЛ Медиа за „Перспективи 2019“.
Таа додава дека треба да се посвети внимание и да се работи со најмладите, бидејќи разочарувачки е тоа што младите од 18 до 29 години се најтолерантни кон корупцијата, односно за 12% се потолерантни од останатите возрасни групи.
„Според извештајот што го објавиме во март минатата година, граѓаните сметаат дека најмногу корупција и притисок има во институциите. Затоа треба Владата која објави ’бомби’ за коруптивното владеење на претходната власт малку повеќе да посвети внимание за борбата против корупција“, додава Нурединоска.
Таа потенцира дека во изминатата година, Државната комисија за спречување на корупција наместо да спречи и превенира коруптивни дејствија, ние бевме сведоци дека и самата Комисија смени петмина членови заради неправилности, и цела година Комисијата беше нефункционална.
„Сметам дека требаше веднаш да се формира нова Комисија со нови членови и да не се чека измена на Законот за спречување на корупција. Со доаѓањето на министерката за правда, Рената Десковска, отпочна со нов процес на подготовка на нов закон за спречување на корупција, всушност настана спој на двата закона за спречување на корупција и судир на интереси, пришто фокус беше ставен во избор на нови членови на ДКСК“, додава таа.
Нурадиноска истакна дека со новиот закон се зголемени надлежностите на ДКСК, односно сега ќе имаат можност да ја следат работата и финансирањето на политичките партии, ќе имаат директен увид во сметките на политичките партии, и ќе имаат пристап до над 60 регистри со што ќе им се олесни работата на комисионерите.
Таа додава дека интересно е тоа што се пријавиле над 80 кандидати за седум членови на ДКСК, што дава надеж дека ќе се изберат најдобрите кандидати, и се очекува политичкото, односно партиското влијание да биде најмаку застапено.
Ангела Петровска
Обработка на текст, фотографија и камера: Дехран Муратов
Монтажа: Ариан Мехмети
