Тон реакции на социјалните мрежи по објавата на новинарот Цветин Чилиманов во која тој отворено повика на насилство кон дописничката на Фајненшл Тајмс, Валери Хопкинс, но ниту една реакција од македонските институции.
Објавата на Чилиманов е порака до таксистите, во која се споменува култниот лик од македонската кинематографија, чичко Кумплунг. Ова јавноста го протолкува како отворен повик за насилство кон новинарката Валери Хопкинс, која напиша:
„Таксист бојкотирач во Скопје: Бугарија мисли дека нашиот јазик не постои, Србија одбива да ни ја признае црквата, Грците го блокираат нашето име и имаме проблеми со Албанците. Ние немаме проблем, сите останати имаат“.
Македонската информативна агенција каде што работи Чилиманов се огради од неговите пишувања. „Македонската информативна агенција во целост се оградува од твитот објавен на социјалната мрежа Твитер, на нашиот вработен Цветин Чилиманов. МИА во рамки на своите надлежности ќе ги преземе сите мерки за утврдување на фактичката состојба и зачувување на угледот на Агенцијата, во согласност со законските прописи“ – соопшти МИА.
На ваквата реакција Чилиманов одговори со уште една објава во која вели: „И јас се оградувам од оваа МИА за многу работи“. Веројатно мислејќи на тоа дека по падот на режимот чиј гласноговорник беше токму тој, повеќе не му одговара одговорноста со која мора да се носи…
Реагираше и претставникот на ОБСЕ за слобода на медиумите, Харлем Дезир, кој најстрого ја осуди ваквата постапка на Чилиманов.
„Заканувачкиот твит на Цветин Чилиманов кон Валери Хопкинс е срамен и неприфатлив. Сите закани кон новинари, особено повиците за насилство кон жени новинарки се неодговорни. Чилиманов мора веднаш да го отстрани твитот“ напиша Харлем Дезир на Твитер.
На ваквите реакции се надоврза и актерот Јовица Михајловски, кој го толкува ликот на чичко Кумплунг во филмот „Самоуништување“.
„Овој Цветин, што го бербати ликот и делото на чичко Кумплунг, да го потсетам дека Кумплунг заврши во инвалидска количка, токму заради сторените дела на кои сега повикува ангажираниот Чилиманов. Го охрабрувам, тој и сите што го делат неговиот став, до крај да ја споделат судбината на ликот Кумплунг и да завршат на ист начин“ – напиша актерот на фејсбук.
До овој момент изостана реакција од надлежните институции, кои по допрен глас можат да гонат поради говор на омраза како кривично дело. Како и во повеќето вакви случаи до сега.
Јавното обвинителство не само што не постапува по допрен глас, туку не постапува и по пријавите кои Министерството за внатрешни работи до сега ги има поднесено.
Прашањето за тоа до кога ќе се толерира ваквата експлицитна форма на говор на омраза и тоа од јавни личности, новинари, кои треба да бидат пример за општеството, останува отворено. Она што е повеќе од јасно е дека повиците за реакција на институциите не смеат да бидат игнорирани.
К. С.
