Училиштата се подготвуваат за почеток на учебната година од 1 септември со физичко присуство на ученици, и за спроведување на препораките кои ги налагаат строгите протоколи за заштита од КОВИД 19 за безбедно одвивање на наставната програма.
На учениците при влезот во училиштето ќе им биде мерена температура со бесконтактен термометар, и доколку е повисока од 37, 4 степени тогаш нема да им биде дозволен влез во училиштето. Истото важи и за вработените во училиштето.
Влез во училиштето ќе биде дозволен само со заштитна маска и по дезинфекција на рацете за сите ученици и вработени во училиштето.
На влезот во училиштата, во училниците и другите простории треба да се постават средства за дезинфекција, заедно со едукативно-информативни материјали и насоки за заштита на здравјето и безбедност во училиштето.
„Првиот ден од наставата задолжително започнува со упатства за сите учениците за тоа како правилно и безбедно да се однесуваат, да носат маски, да одржуваат физичко растојание, хигиена на рацете и заштита на сопственото здравје, но и здравјето на останатите ученици и вработените во училиштето“, стои во протоколот на МОН.
Во протоколот се наведува дека се забранува влез за родители/старатели освен на ученици со посебни образовни потреби со задолжително носење на заштитна маска. Забранети се и сите видови физички контакти за поздравувања меѓу вработените во училиштето и меѓу учениците.
За контролиран влез и излез од училиштата пак, пред и внатре во училиштата треба да се организира редарска служба, со цел задолжително да се спроведе дезинфекција и носење заштитни маски и одржување на потребното растојание, се додава во протоколот.
Учениците од една паралелка е предвидено да претстојуваат во една просторија, без можност за мешање на ученици од различни паралелки во иста училница.
Според протоколот за следење настава со физичко присуство, наставниот час ќе трае 40 минути. Малиот одмор се користи во траење од 5 минути меѓу часовите и голем одмор во траење од 15 до 20 минути. За време на одморите потребно е да се намали колку што е можно повеќе физичкиот контакт меѓу учениците.
Задолжително е проветрување на просториите после секој наставен час, најмалку половина час пред пристигнувањето и по заминувањето на учениците, а доколку дозволуваат временските услови, пожелно е да се остави отворен прозорец за време на наставниот час., а по излегувањето на едната група ученици, задолжително се проветрува просторијата и се врши дезинфекција , по што се дозволува влез на втората група на ученици.
Употребата на тоалетите во училиштата се предвидува да се организира со присуство на помал број ученици и со запазена дистанца, односно, доколку тоалетот е помал, протоколот предвидува дека ученикот треба да почека надвор од тоалетот, додека излезе ученикот кој го користи тоалетот.
Доколку во училиштето се појави заболен од коронавирусот или лице кои имало контакт со лице заболено од вирусот, тогаш според протоколот на МОН, лицето треба да се изолира во посебна просторија со задолжително носење на заштитна маска, а директорот е предвидено да воспостави комуникација со Центарот за јавно здравје.
Доколку ученик развие симптоми на коронавирус додека е во училиште, наставникот или стручниот соработник го изолира ученикот во посебна просторија со задолжително носење заштитна маска и веднаш ги известува родителите или старателите, кои треба во најкратко време да го земат детето со консултација и понатамошни активности со матичниот лекар.
Ова е дел од протоколот за постапување на средните и основните училишта за непречена реализација на воспитно-образовниот систем по одлуката на Влада за почеток на претстојната учебна година со физичко присуство со полн капацитет. Како алтернатива постојат две дополнителни сценарија, односно, преминување целосно на онлајн настава или комбинирана настава, доколку дојде до промена на состојбата со епидемијата.
Поради влошената состојба со епидемијата во полошкиот регион, Комисијата за заразни болести донесе одлука средните училишта во Тетово и Гостивар во првите две недели да започнат со онлајн настава, додека основните училишта со физичко присуство. Состојбата ќе се следи внимателно, и за секоја промена, во зависност од ситуацијата, ќе се разгледува дали има потреба од дополнителни мерки.
