Триесет години по геноцидот во Сребреница, најлошото злосторство извршено во Европа по Втората светска војна, делегација од преживеани, политичари и активисти од Босна и Херцеговина го посети Берлин со јасна порака: Европа не смее да заборави. За време на тридневната посета, организирана во соработка со Фондацијата Фридрих Еберт (ФЕС), делегацијата разговараше со високи германски функционери, претставници на граѓанското општество и новинари, пишува Дојче Веле.
Програмата ги собра претставниците на здруженијата на жртвите, политичките структури и академската заедница, со цел да се потсети на одговорноста на европските институции, но и на потребата од институционален, правен и образовен одговор на негирањето на геноцидот и обидите за историски ревизионизам.
Главната порака на сите говорници беше јасна: сеќавањето на геноцидот мора да стане дел од пошироката европска свест и образование.
„Мора да се погрижиме денот на сеќавање на геноцидот во Сребреница да не падне во заборав“, рече Адис Ахметовиќ, член на германските социјалдемократи (СПД) во Бундестагот. „Сè уште има преживеани, сè уште има луѓе кои можат да зборуваат и да сведочат. Додека е така, треба да работиме на тоа овој ден да биде вклучен во образовниот систем, институциите и универзитетите. Преку Конференцијата на министрите за образование, треба да се овозможи геноцидот во Сребреница да стане дел од редовната настава во сите германски покраини, заедно со Холокаустот, Руанда, Буча и Ирпин.“
Неговите зборови силно одекнаа меѓу членовите на делегацијата, особено затоа што во Босна и Херцеговина сеќавањето на геноцидот се повеќе се соочува со политичко негирање, притисоци и обиди за бришење на историските факти.
Главната и одговорна уредничка на програмата на ДВ за Европа, Аделхајде Фејлке, ја истакна улогата на медиумите: „Како медиуми, имаме посебна одговорност. Мораме да документираме, објасниме и известиме за тоа што се случило тогаш, за да можат помладите генерации да го разберат минатото. Но, исто така, да ги покажеме насоките кон мирна и заедничка иднина.“
Сара Хес-Каљани, претставничка на ФЕС од Сараево, испрати слична порака: „Германија може да биде пример за цела Европа кога станува збор за културата на сеќавање. Ако сакаме да спречиме идни злосторства, мора да учиме од минатото. Сребреница мора да биде присутна во образованието, не само во регионот, туку и низ цела Европа.“
Како што беше кажано на крајот од посетата, оваа годишнина не смее да биде само формална комеморација – туку повик за акција и тест за европската одговорност кон вистината, правдата и иднината во која злосторства како Сребреница никогаш не смеат да се повторат.
