По синоќешната објава на сторијата на Истражувачката репортерска лабораторија (ИРЛ) „Нечиста крв“ која вчеравечер се емитуваше на МРТ1 и на ЈуТјуб каналот на ИРЛ, Скопското јавно обвинителство по допрен глас отвори предмет за недозволеното експериментално лекување на пациенти во клиниката „Жан Митрев“ од Скопје.
„Веднаш по објавата на наведената документарна емисија, Основното јавно обвинителство Скопје оформи предмет врз основа на инструментот на допрен глас, предвиден во Законот за кривична постапка. Предметот е распореден кај надлежен јавен обвинител кој ќе преземе дејствија за проверка на наводите од кои произлегуваат индиции за кривични дела против здравјето на луѓето“, велат од ОЈО Скопје, за 360 степени.
Документарецот е базиран на сведочењето на семејство чиј член починал во приватната клиника откако добил повеќе интрахоспитални бактериски инфекции бидејќи бил подложен на хемофилтрација. Клиниката немала одобрение од МАЛМЕД за користење на оваа метода иако болните од ковид биле ставени на експериментална процедура за лекување. На пациентите, ниту на семејствата не им било кажано дека се предмет на експеримент.
Истражувањето на ИРЛ „Нечиста крв“ се потпира на 24 пријави на граѓани од Северна Македонија и од Косово, кои плаќале илјадници евра без да се известат дека се дел од медицинска студија.
Од ИРЛ денеска соопштија дека по објавување на документарецот во нивната редакција пристигнаа стотици пријави од граѓани за неправилности и злоупотреби во рамки на државниот и приватниот здравствен систем.
„ИРЛ е непрофитна организација со мал тим на новинари кој работи со скромни ресурси. Важно е да нагласиме дека нашата цел и задача е да известуваме за проблемите, но ја немаме моќта која ја имаат институциите да ги спречат овие случаи и да им дадат правна разврска. Затоа е потребно пријавите освен до ИРЛ, да бидат испратени и до институции како јавното обвинителство и надлежните инспекторати“, потенцираат од ИРЛ.
По објавата на документарниот филм насловен како „Нечиста крв“, од клиниката „Жан Митрев“ се згрозени од тенденциозниот говор на омраза, употребуван кон нивната институција, како и од неточните наоди, односно од фабрикуваните информации кои се насочени кон креирање на лажна слика во пошироката јавност за работата на клиниката.
Од клиникта „Жан Митрев“ додаваат дека ќе ги искористат сите правни можности согласно законите со цел да се спречат, како што велат, „овие и сите следни вакви и слични неосновани напади на институцијата“.
Д.М.
