Профилот Фортификација е еден од најагилните на Твитер кој постојано шири партиска пропаганда за ВМРО-ДПМНЕ и црна пропаганда со која се оцрнуваат политичките неистомисленици. Тој профил вчера објави обработено видео од говорот на Петрит Сарачини кој ја отвори Конференцијата на ЦИВИЛ „Меѓу стремежите и реалноста“ што се одржа во петокот, на 29 ноември. Конференцијата, на која учествуваа Претседателот Стево Пендаровски и низа истакнати јавни личности, експерти и лидери на граѓанското општество е дел од настаните со кои се промовираат човековите права и слободи, а воедно се одбележува и 20-годишнината од основањето на ЦИВИЛ.
Обработеното видео се фокусира на рацете на Сарачини, а со објавата на Твитер се упатува серија навреди и инсинуации на негова адреса. Истата објава ја поддржуваат и коментираат и пратеникот Антонијо Милошоски и Александар Даштевски од Антидискриминациската комисија. Објавата понатаму се споделува и коментира од анонимни профили блиски до пропагандата на ВМРО-ДПМНЕ. Коментарите се полни со навреди и говор на омраза, давање дијагнози, исмевање и нарушување на елементарното човеково достоинство.
Како и секогаш порано, така и сега, ЦИВИЛ остро го осудува говорот на омразата насочен против истакнати активисти за човекови права и слободи, каков што е и Петрит Сарачини, инаку познат и како мултимедијален уметник, новинар, колумнист и експерт за медиуми.
Говорот на омразата, клеветите, навредите, вулгарноста и лагите веќе со децении се главна одлика на секојдневното, агресивно дејствување на партиските солдати на споменатата партија и сите што се во нејзината орбита.
Сепак, постојат и промени во однесувањето. Во изминатите три години се нотира и интензивирано вклучување и на највисоките партиски функционери во продукцијата на лажни вести и говор на омраза.
Во очигледно синхронизираниот напад врз Сарачини во споменатата хајка, овој пат, се вклучи и претседателот на Државната комисија за спречување на дискриминацијата, Александар Даштевски, чиј мандат е истечен, но не е јасно дали сѐ уште ја окупира таа позиција или не.
Оваа комуникација на Твитер може да се најде на овој ЛИНК.
Меѓу лајкувачите на грдите напади се наоѓа и Антонијо Милошоски кој на Твитер се претставува како Antonio Macedonian (Антонио Македонски).
Скандал од прв ред е вклучувањето на Даштевски, екс-претседател на државна институција чија мисија е антидискриминацијата, во хајка полна со омраза и клеветништво. Срамно е за институцијата што ја водел, срамно е за образовните институции во кои бил, срамно е за издавачите што му објавувале трудови. Исто како што е срамно за Антонијо Милошоски да го валка дигнитетот на Собранието на Република Северна Македонија со своето недолично однесување, со пласирање на лажни вести и ширење на говорот на омразата.
Даштевски во својата јавна онлајн комуникација со нападнатиот Сарачини се обидува да ја спинува ситуацијата и да најде оправдание за своите постапки, а во еден момент дури и да се прикаже самиот како жртва. Но, фактите се на увид на јавноста, а во својот одговор, Сарачини смирено и аргументирано, иако остро, му укажува на неговата функција и општествена позиција.
Крајно неприфатливо е јавни личности и функционери што се платени од парите на граѓанките и граѓаните, да дејствуваат на ваков начин, спротивно на јавниот интерес, демократските стандарди и законите, небаре се маалски хулигани.
Во името на ЦИВИЛ, организација за човекови права и слободи, формирана и водена од македонски граѓанки и граѓани, ја повикувам јавноста и институциите да ја осудат и да ја санкционираат оваа долгогодишна практика на партиските антидемократски солдатески. Крајно време е да му се стави крај на оваа дивеење.
Џабир Дерала
ЦИВИЛ
