Со заеднички напори да се вратиме на старите патеки на кои бевме и да ги подобриме перформансите во билатералната економска соработка, порача претседателот Стево Пендаровски во обраќањето на денешната деловна средба на македонски и хрватски бизнисмени, што се одржува во Загреб, на вториот ден од неговата официјална посета на Хрватска.
Во македонската бизнис делегација се стопанственици од Сојузот на стопански комори, а средбата е организирана заедно со Хрватската трговска комора. На собирот се разгледуваат потенцијалите за продолжување на соработката од пред пандемијата, со фокус на можностите за нови инвестиции.
Претседателот Пендаровски истакна дека пандемијата нанесе огромни штети на економиите во двете држави и изрази надеж дека погодените сектори како што е туризмот многу бргу ќе се вратат во нормала, со отворање на границите. За тоа, потенцираше тој, особено е важна вакцинацијата против Ковид-19 и добро е што се забележува висок процент на вакцинирани и во двете држави.
– Без вакцинација нема сигурен развој на економијата и враќање во она што било претходно. Вашите проценти се нешто повисоки од нашите, но можам да кажам дека и кај нас во Северна Македонија има значително помасовна фаза на имунизацијата и очекувам дека во следните над месец и половина ќе дојдеме над половично мнозинство на вакцинирани, така што вратите пополека се отвораат за враќање на старите патеки, рече Пендаровски.
Како што наведе шефот на државата бројките во трговската соработка во изминатата година се намалени, но намерата на бизнис заедниците од двете страни во неколку клучни сектори е таа да биде и над нивото од пред пандемијата.
– Оптимистичките сценарија за македонската и хрватската економија се дека четвртиот квартал годинава може да донесе поголеми стапки на економски раст и практично да биде предвесник на она што ќе се случува следната година кога би можеле да очекуваме целосно враќање на економскиот потенцијал како што беше пред 2020 година, потенцираше Пендаровски.
Тој потсети дека економските политики во пандемискиот период беа прилагодени на здравствената криза, наведувајќи дека како и во Хрватска, така и во нашата држава беа донесени шест пакети антикризни мерки, од кои само првите четири беа со вредност од над милијарда евра. – Во таа насока ќе продолжиме да ги стимулираме гранките што беа особено погодени, истакна Пендаровски.
Кога разговараме за економската соработка помеѓу двете држави, но и со другите држави од регионот, нагласи Пендаровски, јасно е дека пандемијата не е единствената причина зошто економската соработка не е на уште повисоко ниво.
– Во нашата економија јасно е дека не се зависи од луѓето во бизнис секторот, јасно е дека се многу значајни стабилноста и интегритетот на институциите, најважно е владеењето на правото, најважно е корупцијата да се сведе на најниско можно ниво за странски инвеститори и бизнисмени да доаѓаат во држава која има предвидлива бизнис клима и стабилен бизнис систем кој може да ги штити нивните права, рече Пендаровски.
Во таа насока, укажа претседателот на Републиката, кај нас се работи интензивно со оглед дека сме на прагот за почеток на преговори со Европската унија.
– После долги години мислам дека можеме да направиме пробив на тој план, посочи Пендаровски, додавајќи дека за бизнисот е важно тоа што станавме членка на НАТО, што меѓу другото е предуслов државата да биде ставена на мапата на земји со предвидлива иднина во која може да инвестираат.
