„Ние како држава бевме предмет на сериозни хибридни напади првпат за време на Референдумот во 2018 година. Меѓутоа тогаш уште не бевме внатре во НАТО алијансата, тогаш добивавме некаква поддршка на билатерално ниво, но не таква каква што добиваме сега. Последниот пат со сихронизиран напад со огромен интензитет кој досега не беше забележан кај нас, со кој беше соборена страницата на Државната изборна комисија на самиот изборен ден, а тоа не го прави еден човек, тоа се приказни за мали деца дека тоа го направиле 2-3 хакери млади луѓе кои направиле таква штета, тоа не е точно“, рече Претседателот на државата, Стево Пендаровски одговарајќи на прашањето на ЦИВИЛ – „Во каква состојба е македонската национална безбедност и стабилност со оглед на зголемување на лажните вести, говорот на омразата, пред сè на етничката припадност и хибридните напади?“.
Тој истакна дека хибридните напади се нов проблем, но наша среќа е што од 27 март оваа година сме членки на НАТО и дека почнавме да добиваме обилна помош и поддршка од другите сојузници во НАТО.
„Хибридните напади за НАТО алијансата се дефинирани како групата на најголеми закани. Во последно време, како се забавува нашто одење кон ЕУ, тие хибридни напади повторно се јавуваат во последниот месец – два, меѓутоа сега не сме сами, сега разменуваме информации и имаме неколку советници на билатерална основа дојдени од многу моќни држави во Алијансата кои токму сега се во Скопје и помагаат во таа насока.
Хибридните закани се практично нормативно нерешени во целиот свет. Тоа е како некој друг вид на физичка закана и очигледно светот сè уште лута во пронаоѓање на добар одговор на хибридните напади. Едната крајност е да се регулираат социјалните мрежи што е веројатно невозможно, другата крајност е државата да пенетрира во социјаните мрежи што претставува шпионажа и што е кршење на основните човекови права и слободи“, нагласи Пендаровски.
Претседателот смета дека со хибридните напади светот а и ние како држава со мали ресурси допрва ќе имаме проблем. Тој истакна дека дури и Америка не може да излезе на крај со хибридните напади и преку своите главни агенции за борба против хибридните напади констатира дека во 2016 година хибридните закани и напади направиле голема штета и дури влијаеле на изборите.
„Во меѓувреме, има потврдени јавно достапни извештаи дека хибридни напади се случувале на последните претседателските избори во Франција, во Холандија и во Германија. Нашиот референдум е ситна работа за тоа“, вели Пендаровски.
Пендаровски учествуваше на Националниот форум на Цивика мобилитас кој се одржа на 16 октомври (петок) во хотел Александар Палас во Скопје.
Дехран Муратов
Видео извор: Цивика мобилитас
