Многу повеќе се почитуваат основните права на граѓаните во однос на правичното и фер судење, но и натаму треба да се работи на борбата против организираниот криминал и корупцијата, покажува набљудувањето на коалицијата „Сите за правично судење“.
Како што беше речено на денешната промоција на најновата анализа на Коалицијата за 2017 година, неопходна е поголема јавност на судските постапки, како и поголема транспарентност на судовите.
– Детектирано е отстапување во толкувањето и примената на законите од основните и апелациските судови, недоволно и нејасно аргументирање на пресудите, како и селективен пристап при постапувањето посебно во предмети кои имаат „политичка нота“. Селективен пристап не е изоставен и при вршењето на јавнообвинителската професија, а политичко влијание е забележано и во одлуките за избор и унапредување на претседатели на судовите и судии во повисоките судови, стои во анализата од спроведениот мониторинг.
Според анализата, констатирана е и нетранспарентна работа на Судскиот совет и Советот на јавни обвинители во однос на образложенијата на нивните одлуки.
– Загрижувачки висок степен на одложени расправи и негов пораст од 30 на 60 отсто најчесто поради отсуство на обвинетиот, е исто така еден од заклучоците во анализата каде се бележи и зголемување од 300 проценти при одлагање на рочиштата поради отсуство на бранител, како и 250 отсто поради отсуство на јавен обвинител.
Коалицијата упатува и на податокот дека постои практика судот не дава соодветни образложенија на причините за определен притвор.
Коалицијата „Сите за правично судење“ постои 15 години, а ја сочинуваат 14 граѓански организации. Изминативе години мониторингот бил фокусиран на кривичните постапки, но од неодамна се анализираат и организираниот криминал и корупцијата, додека од септември ќе почне следењето и на граѓанските постапки. За изготвувањето на анализата ангажирани биле 50 набљудувачи распоредени на сите четири апелациски подрачја, во девет основни судови низ државата. (МИА)
