Припадници на полицијата не дозволуваат извршување на работи за изградба на водоводот над селото Синичане, во Општина Боговиње.
Градоначалникот Албон Џемаили бил повикан на информативен разговор, а од неговата партија обвинуваат за политичка одмазда заради изборниот резултат. Самиот Џемаили, вели дека за водоводот постои проект од Општината и целта е на селаните да им се обезбеди вода за пиење.
„Општината почнала подготовки околу проектот. Вчера бев повикан во полициска станица во Тетово. Не сум криминалец, само сакам на граѓаните да им обезбедам вода за пиење. Полицискиот службеник нема писмена наредба, затоа јас сум убеден дека тука има политичка позадина”, изјавил градоначалникот Албон Џемаили за Алсат.
Од Алијансата за Албанците, партија на која и припаѓа Џемаили, обвинуваат дека загубата на ДУИ во Општина Боговиње ги натера преку полицијата да ги стопираат работите на проектот за вода за пиење во селото Синичани.
„Денеска во полициската станица беше повикан на разговор градоначалникот на Боговиње, Албон Џемаили, каде беше предупреден со закани за итно прекинување на работите за водоснабдување на Синичани. Напротив, ако работите не бидат стопирани, Албон Џемаили ќе биде уапсен. Работите за проектот за водоснабдување се преземени во согласност со сите законски процедури, затоа ваквото однесување на полицијата не може да се смета за ништо друго освен одмазда на ДУИ кои го користат техничкиот министер од редовите на ДУИ, Агим Нухиу, како инструмент за одредени цели“, се вели во реакцијата на Алијансата за Албанците.
Ваквото однесување кое им штети на жителите на Синичани и не само, се вели во соопштението, е апсолутно неприфатливо за нас, затоа барат интервенција на надлежните органи со цел случајот да се расветли и работата да продолжи без закани од полицијата.
Истото, обвинуваат од ААм, се случи во Арачиново, каде МВР изврши контрола во куќата на семејството Небиу, според нив, како знак на одмазда за нивната загуба.
„Овие закани и притисоци за жал доаѓаат веднаш по назначувањето на Агим Нухиу за министер за внатрешни работи. Ова уште еднаш ја докажува злоупотребата на власта за партиски цели од страна на функционерите на ДУИ. Го прашуваме министерот кој е следен да биде загрозен? Куманово, Врапчиште или Гостивар и Тетово? Апелираме до албанскиот министер на МИЛИЦИЈАТА на ДУИ, подалеку од Албанците!”, продолжува соопштението.
Алијансата за Албанците бара одговорност од СВР Тетово и министерот Нухиу за заканите против какви било функционери на Алијансата за Албанците. Во меѓувреме, тврдат дека ги известувале и амбасадите во земјава за, како што викаат, политичката репресија со која се соочуваат жителите на овие села, кои се лишени од основните услови за живот, како што е водата.
Од МВР сè уште нема официјално соопштение околу настанот и повикот на градоначалникот Џемаили на информативен разговор.
Арбен Зеќири
