Русија активно учествува во задушувањето на студентските и граѓанските протести во Србија, исто како што интервенираше безброј пати за да ја зачува власта во Белград, објави денеска полската приватна телевизија Полсат.
-Обидите на српската полиција насилно да ги разбие протестите резултираа со нивно прелевање од Белград во 30 други градови. Протестите беа поврзани само со внатрешната ситуација во земјата сè додека Русија неочекувано не интервенираше. Во писмо вчера, поранешниот вицепремиер Александар Вулин ѝ се заблагодари на Москва за нејзината помош, објави националната телевизиска станица.
Полсат предупредува дека употребата на сила против студентските и граѓанските протести го привлекува вниманието на меѓународните организации за човекови права, кои тврдат дека властите ги кршат основните човекови права и дека српскиот претседател Александар Вучиќ јавно поддржал директна репресија против ненасилните собири.
-Експертите во разговорите со српските медиуми го делат мислењето дека суровата неутрализација на протестите е доказ дека политичарите се беспомошни и нервозни. Сепак, српската влада може да смета на поддршката од Русија. Москва интервенираше неколку пати за да го зачува внатрешниот ред во Србија, ширејќи пропаганда каква што е против украинскиот народ, наведува полската телевизија.
Како пример, Полсат наведува дека, иако студентите и граѓаните на протестите воопшто не ја споменуваат темата за војната во Украина и нивниот протест се однесува исклучиво на ситуацијата во земјата, одеднаш почнаа да се појавуваат транспаренти со антиукраински слогани.
-Вучиќ дозволува пропаганда на Кремљ во својата земја во замена за политички бенефиции. Тој може да воспостави која било влада што ја сака без да се плаши дека ќе биде соборена, ја пренесува Полсат проценката на српските аналитичари, додавајќи дека друга придобивка е што Москва има пазар за своите производи во Србија, а Белград може да смета на поповолни цени за увоз од Русија.
Зборувајќи за настаните во Србија, чешкиот јавен радио сервис Радиожурнал денеска предупреди дека не може да се каже дека Вучиќ и српските власти безрезервно ја поддржуваат Русија на Балканот, туку дека станува збор за маневрирање меѓу сите меѓународни актери, што не е невообичаено на Западниот Балкан, а е инспирирано и од надворешната политика на комунистичката СФРЈ и маршалот Јосип Броз Тито.
-Вучиќ вели дека сака да ја внесе Србија во Европската Унија, но во исто време тврди дека тоа не е реално. Мислам дека апсолутно му одговара ако не се во ЕУ. Би имало повеќе контроли во сивата зона…Тоа сигурно не е нешто што би го сакал. Тој не сака никој да го контролира она што го прави, изјави за Радиожурнал Магдалена Фојтова, новинарка во неделникот „Респект“ која ги следи настаните на Балканот.
Војтова, која известува од протестите во Србија, верува дека не е надворешната политика таа што ги мачи луѓето во Србија, туку дека заедничкиот именител на студентските и граѓанските протести е тоа што долгогодишното владеење на Вучиќ и СНС ја доведе земјата во состојба каде што корупцијата стана апсолутен дел од секојдневниот живот. Тие изјавија дека полицијата е контролирана од политичките елити и дека сите државни и полудржавни компании, како и институциите, се под нивно влијание, пренесе МИА.
