Специјалното јавно обвинителство има рок до крајот на неделава, до 30 јуни, да поднесе обвиненија произлезени од прислушуваните разговори. Досега, тимот на Катица Јанева отвори 19 истраги, а се покренати само три обвиненија.
Јанева, пред два дена од Охрид, порача дека за некои осомничени ќе има запирање на истагата и отфрлање на обвиненијата, а за некои од нив, ќе се поднесе обвинителен акт, но дека следната седмица ќе бидат донесени јавни обвинителни одлуки.
Во однос на рокот за поднесување обвиненија, Јанева рече дека се надева оти ќе биде изнајдено решение во најбрз можен рок. Таа се надева дека Судот ќе ги поддржи и потврди обвиненијата.
Наспроти ваквите надежи на Јанева, која викендов одржа предавање пред учесниците на Школата за природно право во Охрид, медиумите веќе пренесуваат дека нема да може да се подигне обвинение за случајот „Талир“, поради процесни причини.
„Талир“ се однесува на финансирањето на партијата ВМРО-ДПМНЕ во која се осомничени 14 лица, а првоосомничен е лидерот на партијата, Никола Груевски.
Причината за стопирање на процесните дејства, како и за неможноста да се подигне обвинение, е фактот што до потребниот рок, три осомничени лица не ги добиле поканите за распит за овој случај, а тоа се Никола Груевски, Мартин Протугер и поранешниот генерален секретар на партијата, Кирил Божиновски.
Во однос на мандатот за покренување на обвиненија се споменуваат три варијанти. Првата е да се изгласа промена на член 22 од Законот за Специјалното јавно обвинителство. Втората варијанта е Уставниот суд да го поништи член 22, како неуставен, за да може да се финишираат сите предмети, без временски ограничувања. Третата опција е СЈО да се приклучи во редовното Јавно обвинителство, па покрај Обвинителството за организиран криминал, да постои и СЈО, како обвинителство чија мисија е истражување и гонење на кривични дела поврзани со содржината на незаконското следење на комуникациите.
Мандатот на оваа институција е пет години од моментот на основање, период во којшто може да се покренуваат и нови истраги, но не и обвиненија.
ЦИВИЛ – Центар за слобода на прес-конференцијата на 13 јануари 2017, категорично побара продолжување и проширување на мандатот на Специјалното јавно обвинителство.
ЦИВИЛ изразува убеденост „дека слабостите, незаконитото постапување, кршењето на изборните процедури, купувањето на гласови, заканите, злоупотребите, притисоците и уцените, како и низа други сериозни нерегуларности кои ги нотира ЦИВИЛ на изборите, се директна последица на втемелени во криминалните практики и постапки кои се надоврзуваат или имаат директна или индиректна врска со предметите што ги води токму СЈО“.
