Истрагите за воени злосторства извршени од воената коалиција предводена од Саудиска Арабија во Јемен, немаат кредибилитет и не успеаја да обезбедат правда за цивилните жртви, објави Хјуман рајтс воч.
Извештајот на Хјуман рајтс воч е на 90 страници и носи наслов: “Криејќи се зад Коалицијата: Неуспехот да се истражи и да се обезбеди правда за незаконските напади во Јемен”. Во извештајот се анализира работата на истражниот орган на коалицијата, наречен Заеднички тим за проценка на инциденти (Joint Incidents Assessment Team – ЈИАТ), во изминатите две години.
Хјуман рајтс воч во својот извештај обелодени дека работата на ЈИАТ е далеку под нивото на меѓународните стандарди во однос на транспарентноста, непристрасноста и независнноста. ЈИАТ е основан во 2016 година под притисок од меѓународната јавност, а по натрупаните докази за кршењето на законите на војната и воените злосторство извршени од страна на воената коалиција во Јемен. Експертите на ЈИАТ, ни по две години непречена работа, не успеаја да најдат докази за „тврдењата и несреќите“ за време на воените операции. Сѐ што ЈИАТ успеа да направи е да обезбеди крајно сомнителни анализи и заклучоци.
“Повеќе од две години коалицијата тврдеше дека ЈИАТ веродостојно ги испитува наводно незаконските воздушни напади, но истражувачите спроведоа нешто што е налик на прикривање на воените злосторства”, рече Сара Леа Витсон, директорка на блискоисточната канцеларија на Хјуман рајтс воч. “Владите што ѝ продаваат оружје на Саудиска Арабија треба да признаат дека лажните истраги на коалицијата не ги штитат од тоа да бидат соучесници во сериозните повреди на правото во Јемен”.
Јавните заклучоци на ЈИАТ предизвикуваат сериозни прашања во врска со истрагите за примената на законите на војната. Во огромен дел од нивната истрага се тврди дека коалицијата постапувала законски, нивните тимови не ги истражиле пријавените напади или тврдат дека коалицијата направила „ненамерни“ грешки. Од 75 јавни извештаи за кршење на законите на војната и за воени злосторства во Јемен, ЈИАТ препорачува самата воена коалиција да преземе понатамошни истраги или дисциплински мерки во само два случаи.
подготви: М. Л.
