Тематскиот форум „Предизвици, перспективи и потенцијали на миграциите“, што ќе се одржи на 5 јули во Чифте амам, Скопје е фокусиран на соработката на граѓанските организации со власта, со организациите на дијаспората, со деловниот сектор, со граѓаните и другите засегнати страни за проблемите и придобивките од миграциите во и надвор од Македонија.Организаторот Цивика Мобилитас, заедно со грантистите што работат на миграциските проблеми, Извор од Кратово и Центар за развој на заедницата од Кичево, најавуваат дека форумот ќе го отвори Sybille Suter Tejada, амбасадорка на Швајцарија во Македонија, а говорници ќе бидат Едмонд Адеми, министер за дијаспора, Златко Николовски, претседател на Нов Контакт – Центар за информативна и логистичка поддршка, Калина Гривчева – Старделова, претседателка на Лекарската комора на Македонија и Методија Стојчевски, претседател на Младинискиот сојуз.
На панелот ќе се дискутира и за иселувањето и мобилноста на младите, лекарите, уметниците, за влијанието на миграциите врз деловниот и другите сектори, како и за улогата на граѓанските организации во адресирање на миграциите.
Покрај панелот, ќе се одржи и работилница „Заедно за акција: Потенцијалите од миграцијата за Македонија“ за идентификување на заеднички идеи и акции, како и на истражувања за миграциските прашања на теми што ќе произлезат од дискусијата на форумот.