Родителите на починатите во мартовскиот пожар во дискотеката „Пулс“ во Кочани вчера по 24-ти пат маршираа за своите ангели.
Маршот започна од Паркот на Револуцијата, преку Трговскиот центар, мостот кај Шопинг центарот до зградата на Управата за јавни приходи. Поворката продолжи кон полициската станица и заврши пред Основниот суд, од каде беше упатено ултимативно предупредување до Обвинителството и Судот, од каде очекуваат одговори на прашањата што претходно им ги доставиле во писмена форма.
– Доколку до петок, 3 октомври, не добиеме официјален одговор ќе нема повеќе маршеви, ќе продолжиме со протести и блокади. Нема повеќе мирни чекори. Нема повторно молчење, порачаа родителите.
Тие од ОЈО очекуваат одговор до каде е постапката против вработените во МВР и кога ќе има обвинети и обвинение, додека од судиите во Кривичниот суд, пак, бараат да знаат кога ќе ја донесат оценката на обвинителниот акт.
– Време е да се стави крај на одолговлекувањето и да се овозможи вистинска правда. Овие барања Ви ги доставивме и писмено по пошта. Доста е, сметаат родителите.
Тие рекоа дека не станува збор за позадински политички влијанија на партии врз нив, туку дека тоа се тие, родителите, и нивниот бес, тага и револтот против системот. Сметаат, како што велат, дека постојат обиди да се направи селективна „правда“, наместо да има вистинската правда која им припаѓа на нивните деца.
– Правдата не чека. Жртвите не се бројки, тоа се нашите деца, браќа, сестри. Цели семејства се уништени, револтирано рекоа родителите, додавајќи дека бараат одговори, одговорност и вистинска правда.
Извор: МИА
Фото: скриншот
