Рускиот медиум Комерсант објави колумна во која новинарот Максим Јусин пишува дека повлекувањето на Русија од Украина може да ја искомплицира потрагата на Москва по сојузници.
Колумнистот на Комерсант смета дека „вознемирувачките вести од украинските фронтови“ не создаваат најповолна позадина за меѓународните контакти на рускиот претседател и можат да ја искомплицираат потрагата на Москва по сојузници.
Јусин отворено пишува дека руската армија се повлече од регионот Харкив, иако руското Министерство за одбрана тврди дека станува збор за прегрупирање.
Поради повлекувањето, пишува колумнистот, Русија би можела да го доживее тоа, ако не нејзините сојузници, тогаш барем нејзините партнери во конфронтацијата со Западот, да ја сменат страната.
Иако отворено не застанаа на страната на Русија, во изминатите шест месеци тие придонесоа за намалување на санкциите и политичкиот притисок. Некои одбија да поддржат антируски резолуции во ОН. Некои не се приклучија на западните санкции, и покрај сето убедување и заканите на Американците и Европејците. Некои не почнаа да ја координираат својата политика на пазарот на нафта со Западот, продолжувајќи ја соработката со Кремљ во рамките на ОПЕК+ и спречувајќи пад на светските цени на енергијата, пишува колумнистот.
Тој, исто така, наведува дека некои земји продолжиле да купуваат руска нафта, а со тоа и помогнале на Москва да го наполни буџетот и ги игнорирале барањата на членките на Г7 да се придружат на ембаргото.
Некои замижуваа пред паралелниот увоз на западни производи, кој бизнисмените од Русија го организираа преку тие земји и на тој начин спречија потрошувачите целосно да го почувствуваат недостигот. Сето тоа беше можно додека во светот постоеше чувство дека Москва и покрај пролетните неуспеси, главно ја задржува иницијатива на украинските боишта, ја контролира ситуацијата, полека но стабилно оди напред, постигнувајќи ги своите цели, и покрај се поопипливата поддршка на Западот за Киев, пишува Јусин.
Но, сега во светските медиуми, не само во западните, се појавуваат сосема поинакви вести, вели тој.
Весниците и телевизиите во Кина, Индија, Саудиска Арабија, Казахстан, Србија, Турција, исто така, не можат да не ги забележат резултатите од украинската контраофанзива. Во тој контекст, политичарите од земјите од Азија, Африка, Латинска Америка и постсоветскиот простор можат да добијат впечаток дека руската одбранбена линија во конфликтот со Западот почнува да слабее, дека процесот почнал, дека Киев и НАТО сојузниците кои стојат зад него сериозно и на долг период, ја преземале иницијативата, пишува Јусин.
Тој додава дека „светот ја почитува силата и претпочита да има работа со победниците. Пример се воените успеси во Сирија, по кои престижот на Москва во арапските земји значително се зголеми. По повлекувањето во Харкив, имиџот на руската војска и руската држава би можел да се промени“.
Јусин предупредува дека некои светски лидери може да ја изгубат желбата за судир со Западот за да ги одржат односите со оние кои почнуваат да пропаѓаат.
Единствениот начин да се избегне ова би било да се стабилизира ситуацијата на линијата на фронтот, да се преземе иницијатива и да има неколку успешни операции. Или барем една, но ефективна. Наскоро ќе дознаеме дали руските вооружени сили се способни да извршат таква операција, пишува новинарот на рускиот весник Комерсант.
