Рускиот кантавтор Вадим Стројкин почина на 6 февруари паѓајќи од прозорец, откако безбедносните службеници упаднале во неговиот стан, објави руската невладина организација за човекови права ОВД-Инфо.
Стројкин, наводно, паднал од прозорец додека полицајците вршеле рација во неговиот дом како дел од кривичната истрага за наводната донација на пејачот за вооружените сили на Украина. Кијив Индипендент не можеше самостојно да го потврди овој извештај.
Руските медиуми тврдат дека Стројкин се повлекол во друга просторија додека полицајците упаднале во неговиот стан во Санкт Петербург, а потоа паднал од прозорец на 10-ти кат и наводно починал на местото на настанот. Најмалку еден руски медиум ја нарече неговата смрт како „самоубиство“.
Истражниот комитет на Русија, наводно, започнал истрага за смртта на Стројкин.
Стројкин претходно зборуваше против целосната руска инвазија врз Украина на веб-страницата на социјалните медиуми ВКонтакте во 2022 година. Неговите објави ја осудуваа војната и го критикуваа рускиот претседател Владимир Путин.
Од инвазијата во 2022 година, голем број истакнати руски личности мистериозно умреле откако паднале од прозорците. Познатиот руски балетан Владимир Шклјаров, кој исто така ја осуди војната во Украина, почина во ноември 2024 година, откако наводно паднал од својот стан на петти кат. Неговата смрт беше пријавена како „несреќен случај“.
Русија, исто така, приведе и наметна строги затворски казни против граѓани за јавно критикување на војната или донирање мали суми пари за украински добротворни организации – дела кои сега се сметаат за предавство според рускиот кривичен законик.
Подготви: Д. Мишев
