Соединетите Американски Држави очекуваат по изборите во Северна Македонија да се формира Влада посветена на европската интеграција на земјата.
Од друга страна, имаме два политички блока во земјава кои учествуваат на изборите на 8 мај, од една страна е опозициската ВМРО-ДПМНЕ, која продолжува да се спротивставува на одобрувањето на уставните измени кои се „виза“ за натамошен напредок на земјата кон ЕУ и блокот на проевропските партии на власт, коалицијата на традиционалните партнери на СДСМ, ДУИ и албанските опозициски партии во рамките на коалицијата ВЛЕН (Вреди), кои се изјаснија дека учеството во идната Влада ќе го условат со уставни измени.
Политичкиот аналитичар и публицист Петар Арсовски во изјава за „Фронтлајн“ вели дека во основа е точна констатацијата дека тврдиот став на ВМРО ДПМНЕ по прашање на уставните измени, нешто што е приоритет за меѓународната заедница, но и за голем дел од партиите на Албанците во државата, ќе направи тешко да најде коалициски партнер, односно ќе го искомплицира процесот на формирање Влада.
Сепак, тој е на мислење дека тоа ќе биде пресудно, односно ќе го спречи ВМРО-ДПМНЕ да формира влада доколку ги добие изборите.
– Прво, тој став нема да биде кончен кога ќе се формира владата. ВМРО-ДПМНЕ нема да каже никогаш дека нема да ги прифати уставните измени, туку ќе најавува дека ќе добие подобри услови, ќе најави дека е за европски интеграции итн., така што партиите на Албанците кога ќе коалицираат со ВМРО-ДПМНЕ нема да добијат конечно НЕ од нивна страна. Второ, кај партиите на Албанците можноста да се влезе во влада, сметам дека ќе биде поважна од уставни измени веднаш, имајќи предвид дека уште ќе се надеваа дека уставните измени се возможни во текот на владењето, констатира Арсовски.
Заменик помошникот државен секретар на САД за европски и евроазиски прашања и специјален претставник за Западен Балкан, Габриел Ескобар изјави дека Северна Македонија е многу солиден партнер на САД, и билатерално и мултилатерално во НАТО и ОБСЕ, а Вашингтон очекува и по изборите земјата да има влада посветена на членство во ЕУ.
– Претходната влада беше посветена на членството во НАТО и членството во ЕУ и нашите очекувања се дека владата што ќе дојде по изборите ќе биде слично посветена на членството во НАТО, членството во ЕУ и борбата против корупцијата, изјави Ескобар на брифингот во Брисел пред неговата посета на Приштина, Виена и Подгорица.
На прашањето дали Предлог-резолуцијата на Сенатот на САД, со која се бара отворање на првиот преговарачки кластер на ЕУ со земјава без дополнителни билатерални услови, претставува промена на ставот на САД во однос на измената на Уставот, Ескобар нагласи дека Северна Македонија и Бугарија се важни членки на НАТО и сојузници на Вашингтон, па американската администрација сака мирно решение за сите прашања.
Според него, САД се посветени на продолжување на дијалогот меѓу Северна Македонија и Бугарија врз основа на факти и се посветени на обезбедувањето на зачувување на европската перспектива во земјата.
– Добивме гаранции од Бугарија дека сакаат Северна Македонија да биде членка на ЕУ. Мора да ги искористиме овие можности, бидејќи Северна Македонија мора да биде рамноправен кандидат за членство во ЕУ, додаде Ескобари.
Според него, токму отворените прашања во регионот го прават Западен Балкан подложен на злонамерно мешање од страна, вклучително и од Русија, па за да се намали ризикот од него, мора да се работи на надминување на нерешените прашања.
Извор: Фронтлајн / Дестан Јонузи
