Во Собранието на Република Македонија денеска седници ќе одржат комисиите за труд и социјална политика, за образование, наука и спорт и за транспорт, врски и екологија.
На дневен ред на Комисијата за труд и социјална политика се измени на Законот за вработувањето и осигурување во случај на невработеност, Предлог-закон за приватните агенции за вработување, двата во второ читање, како и измените и дополнувањата на Законот за работните односи, во прво читање.
Членовите на Комисијата за образование и наука ќе расправаат за измени на Законот за обука и испит за директор на основно училиште, средно училиште, ученички дом и отворен граѓански универзитет за доживотно учење, измени на Законот за основање на Технолошко – технички факултет, Ветеринарен факултет и Правен факултет во состав на Универзитетот „Св. Климент Охридски“ во Битола, двата во прво читање, поднесени од пратеници од владејачкото мнозинство, како и Предлог-закон за поддршка на млади при купување на музички инструменти, во второ читање.
На дневен ред на Комисијата за транспорт, врски и екологија се измените и дополнувањата на Законот за просторно и урбанистичко планирање, во прво читање, поднесен од пратеници од владејачкото мнозинство, како и Годишниот извештај за работата на Агенцијата за електронски комуникации за 2017 година, Предлог – одлука за одобрување на Годишниот извештај за работа на Агенцијата за регулирање на железничкиот сектор за 2017 година, како и годишните извештаи за работата на Агенцијата за пошти, на Агенцијата за аудио и аудиовизуелни медиумски услуги и за работата на Македонската радио телевизија за 2017 година. (МИА)
