Србија одбележува седум месеци од трагедијата на железничката станица во Нови Сад, во која загинаа 16 лица, а која предизвика криза во земјата во обидите да се пронајдат одговорните за коруптивните практики и лошо извршените работи во неодамнешната реконструкција, јавуваат српските медиуми.
Од 11:52 до 12:08 часот, граѓаните низ целата земја одржаа 16-минутен молк во чест на 16-те жртви при падот на настрешницата на железничката станица на 1 ноември 2024 година, што предизвика бран антивладини протести со обвинувања за корупција. Студентите повикаа на протести во 32 градови, а во Белград беше објавена блокада на два клучни моста во траење од 18 часа.
На денот кога се навршуваат седум месеци од трагедијата во Нови Сад, владата објави дека постои можност станицата во Нови Сад да биде срушена или повторно реконструирана, бидејќи е затворена од 1 ноември минатата година.
Зградата на станицата во Нови Сад, по целосна анализа на статиката, ќе биде срушена, обновена или делумно употребена таму каде што е целосно безбедна, изјави за белградските медиуми министерката за градежништво, транспорт и инфраструктура, Александра Софронијевиќ.
„Високиот суд во Нови Сад побара продолжување, односно измена на обвинението, а таа изменета истражна постапка е сè уште во тек. Паралелно со тоа, имаме забрана за влез во зградата на станицата, а издадена е и наредба да се испита целокупната статика на зградата на станицата“, изјави Софронијевиќ.
Зградата на станицата во Нови Сад е дел од амбициозен инфраструктурен проект за изградба на брзата железница Белград-Нови Сад-Суботица-Будимпешта.
Во февруари оваа година, српскиот претседател Александар Вучиќ, по разговорот со унгарскиот премиер Виктор Орбан, изјави дека очекува веќе во 2026 година, брзите возови од Белград до Будимпешта да пристигнат за два часа и 40 минути.
Ова е последното конкретно официјално соопштение засега, откако Вучиќ уште во 2015 година за време на свеченото објавување на проектот за модернизација и изградба на железницата Белград-Будимпешта изјави дека е договорено железницата Белград-Нови Сад „мора да биде отворена во 2018 година“.
