Со интонирање на државната химна и химната на Армијата на Република Северна Македонија, денеска во Касарната Илинден во Скопје почна, свеченоста по повод Денот на Првата пешадиска бригада, на која присуствуваат министерката за одбрана Радмила Шекеринска, началникот на Генералштабот, генерал-потполковник Васко Ѓурчиновски и командантот на бригадата, бригаден генерал Бесник Емини.
Министерката за одбрана Шекеринска истакна дека и е чест што присуствува на одбележувањето на Денот на Првата пешадиска бригада.
– Ако Армијата е едно тело, тогаш вие сте срцето, па и ’рбетот, на тој организам. Вие сте јадрото, без кое тој организам не може да постои и не може да ја покаже својата сила и својата виталност. Во тоа најдиректно се уверив и јас и многу мои колеги, и минатата година, кога и ние, како и светот, бевме погодени од пандемијата. Во тие моменти, на пандемијата одговоривме со вонредна, а потоа и со кризна состојба. И единствената и суштинска причина, зошто тие состојби ни беа неопходни, беше за да ве искористиме вас, вашата професионалност и знаењето, искуство и моќта на оваа армија. Бевте секаде каде што државата тоа од вас го побара, потенцира Шекеринска.
Таа подвлече дека војниците прво заминале во Дебар, каде им помогнаа на граѓаните, кои први се соочија со злото наречено корона вирус. Потоа биле присутни во болниците и околу нив, каде што поставувале шатори, дезинфицирале јавни површини.
– Несебично им помагавте и им помагате на своите колеги и во здравството и во полицијата. Бевте и сте на границите. Спречивте, само во минатата година, 1400 обиди за илегално поминување на границата. Затоа, вчера Владата повторно донесе одлука со која се прогласува кризна состојба на нашата јужна и северна граница. Не заради друго, туку за да вие можете да го покажете своето, за да продолжите со одличната работа и за да ние можеме да живееме без грижа што се случува на и околу нашите граници. Со околу 300 интервенции во граничниот регион кај Гевгелија ја заштитивте и ја одржавте функционална безбедносната ограда. Ја браневте својата татковина и своите граѓани, истакна министерката за одбрана, додавајќи дека нема поголема гордост од тоа да сториш нешто за својата држава и за граѓаните, порача министерката.
Таа се осврна и на тоа дека улогата на Првата пешадиска бригада е клучна и за нашето членство во НАТО, потенцирајќи дека баталјонот се обучува според највисоките стандарди. Шекеринска спомне дека од оваа бригада се препознатливи и во разните НАТО мировни операции, од Авганистан, па и претходно во Ирак.
-Вие сте нашите воени амбасадори и први претставници, подвлече Шекеринска.
Началникот на Генералштабот, генерал-потполковник Васко Ѓурчиновски им оддаде јавно признание на припадниците на Првата пешадиска бригада за нивниот квалитет, професионализам и резултати во извршувањето на секојдневните работни задачи.
-Граѓаните, државното раководство и Генералштабот ги препознаваат резултатите и патриотизмот во извршувањето на задолженијата на дневна основа. Од денеска продолжуваме со асистенција на Министерството за внатрешни работи во справување со кризата со мигранти на јужната и северната граница. Продолжуваме со нашата поддршка на министерствата за справување со пандемијата, како и со нашите трансформациски процеси кои се спроведуваат и во овој момент. Очекувам успешно завршување на процесот на трансформација во периодот кој следи и наредната година на денот на одбележување на Првата пешадиска бригада тој процес да биде завршен, рече началникот на Генералштабот, генерал-потполковник Васко Ѓурчиновски.
На свеченоста беа доделени парични награди и благодарници на воени и цивилни лица за вложениот труд во Армијата.
