Коалицијата „Сексуални и здравствени права на маргинализираните заедници“ и СТАР-СТАР, Здружение за поддршка на сексуалните работници, во рамки на деновите против насилство врз сексуалните работници организира низа настани, на 15-ти декември, предавање на Лора Агустин на тема – „Секс на маргините“, на 16 декември – перформанс Skopje Red Light District и во недела на 17 декември ќе има марш на „Црвениот Чадор/Red Umbrella March“.
Книгата на Лора Агустин прикажува како сексуалната индустрија функционира како несигурен пазар на труд за жените, вклучувајќи ги и недокументираните мигранти. Во оваа книга се наведува спасувачката индустрија, моралните претприемачи кои тврдат дека зборуваат за сите жени кои продаваат секс и ги претвораат во жртви на трговија со луѓе. Оваа книга експлодира неколку митови: дека продажбата на секс е сосема поинаква од која било друга работа, дека мигрантите кои продаваат секс се пасивни жртви и дека мноштвото луѓе за да ги спасат, се без личен интерес.
Skopje Red Light District претставува уметнички перформанс кој го отсликува шармот на улицата на фенерите во Амстердам. Улицата на црвените светла претставува симбол на слободниот и толерантен став кон најстарата професија на светот. Почитувањето на луѓето без оглед на нивната професија е она за кое сите треба да се бориме. Уметничкиот перформанс ќе трае и ќе може да се погледне од 17:00 – 22:00 часот на бул. Климент Охридски, до клубот VULKAN.
Граѓанската иницијатива за заштита, промоција и унапредување на правата на сексуалните работници СТАР-СТАР од Скопје, годинава на 17-ти декември по деветти пат со слоганот „Слободниот избор е право, а не привилегија” се приклучува кон Глобалното одбележување на Меѓународниот ден за СТОП на насилството врз сексуалните работници. Маршот ќе започне во 12 часот, пред спомен куќата на „Мајка Тереза“.
Меѓународниот ден за СТОП на насилството врз сексуалните работници за прв пат беше одбележан во 2003 година како спомен и почит за жртвите-сексуални работници на убиецот од Грин Ривер во Сиетл, Вашингтон кој потоа беше осуден на доживотна казна затвор. Оттогаш на овој ден секоја година се организираат протесни маршови на сексуалните работници од целиот свет кои се борат против насилство и дискриминација. Црвениот чадор е глобален симбол на сексуалната работа. Црвената боја е симбол на убавината, а чадорот е симбол на отпор против дискриминацијата и насилството.
Д.М.
