од корнер: ЗОРАН ИВАНОВ
Сега, дури сега, дури допрва Фросина Ременски ќе летала од СДСМ. Професорката по безбедност, истрагата ќе потврди или ќе негира, но обвинителството натаму упатува, е меѓу оние што финансиски се обезбедувале и преку рекет. Партискиот претседател и премиер Зоран Заев експресно најави дека ќе ја отстрани од сите партиски и државни функции.
Ременски беше министерка, кратко време, ама министерка, па пратеничка, па потпретседателка на партијата, дури и актуелна потпретседателка на собранието од редот на партиската пратеничка група. Политички стартуваше како член на ВМРО-ДПМНЕ за, еве, политичката кариера да ја привршува како врвен функционер на соперничката СДСМ.
Сега срамот за сопствената партија, чиј кадар го инсталираше и на висока државна функција, во крајна истанца ќе го понесе самиот тој, Зоран Заев. А ако само малку навреме и само малку накусо ја согледаше нејзината политичка биографија, ќе ја немаше оваа, и по него, грда афера. Но Ременски не е единствениот сомнителен и избербатен некадарник кој се мува во близина на премиерот и партиски претседател. Пред половина година тој најави енергична кадровска метла. Ама тогаш само млако запафта со неа, па во неговата најблиска близина му остана уште доста пајажина. Таа и натаму му го замаглува кадровскиот поглед.
Аферата со својата функционерка Ременски, Зоран Заев ќе ја плаќа со сопствениот и со партискиот рејтинг. Ова искуство плус можеби ќе го мотивира да се поврати по метлата, зашто е многу евидентно дека има уште побаеги што да замете во своето блиско опкружување.
Премиерот ќе мора брзо да реши – со метлата или на неа.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
Доколку некоја содржина е потпишана со ЦИВИЛ Тим за комуникации, тогаш преземањето е дозволено во целост.
