По санкциите на САД воведени врз руските нафтени корпорација Роснефт и Лукоил претходно овој месец, Министерството за финансии на САД издаде официјална лиценца во среда со која се дозволуваат трансакции со подружници на Роснефт во Германија за дополнителни шест месеци.
Содржината на лиценцата беше објавена на официјалната веб-страница на Министерството за финансии на САД, објави Укринформ.
Во лиценцата се наведува дека „сите трансакции забранети со регулативите за санкции за штетни странски активности на Русија, во кои учествува Роснефт Дојчланд Рафининг енд Маркетинг или кој било субјект во кој RN Германија или RN Рафининг енд Маркетинг поседуваат, директно или индиректно, поединечно или вкупно, 50 проценти или поголем удел, се овластени до 00:01 часот по источно летно време, на 29 април 2026 година“.
На овој начин, Министерството за финансии на САД го одобри барањето на Германија за укинување на санкциите врз германските подружници на Роснефт, со што се увери дека тие не се под руска контрола.
Претходно, Вашингтон му постави рок од шест месеци на Берлин да го реши прашањето во врска со средствата на руската нафтена компанија Роснефт.
Германија бара од САД да исклучат три рафинерии од санкциите за нафта врз Русија
Како што објави ТВП Ворлд на 24 октомври, веднаш по воведувањето на санкциите на САД врз руските нафтени гиганти, ваквата ситуација ја поттикна владата во Берлин да отвори разговори со САД за можни ослободувања за три рафинерии во Германија кои се во сопственост на локалната подружница на Роснефт.
По инвазијата на Украина, Роснефт Дојчланд и нејзините средства беа ставени под привремено старателство надгледувано од германскиот федерален регулатор за енергија, кој сега управува со нив.
Сепак, рускиот Роснефт сè уште делумно ја поседува својата германска подружница, со удел од 50%, според германскиот канцелар Фридрих Мерц.
Мерц изрази увереност дека Вашингтон ќе одобри ослободување за да им овозможи на рафинериите да продолжат со работа – исто како што направи Велика Британија кога објави санкции врз Роснефт минатата недела.
„Ќе разговараме за ова со Американците“, рече канцеларот во четврток. „Претпоставувам дека ќе биде одобрено соодветно ослободување за Роснефт.“
Портпаролот на владата на Мерц тврдеше дека подружниците на Роснефт во Германија се „одвоени од нивната руска матична компанија“, додавајќи дека санкциите на САД „не се наменети да ги таргетираат подружниците на Роснефт во Германија“.
Закана за прекин
Клучните клиенти се заканија дека ќе ги прекинат врските со Роснефт Дојчланд како одговор на санкциите на САД објавени во среда, изјавија извори од индустријата за американскиот бизнис медиум Блумберг.
Во случајот со санкциите на Велика Британија врз Роснефт, Германија преговараше за посебна клаузула со Лондон, со која германската подружница беше ослободена од ограничувањата. Извештаите сугерираат дека официјалните лица се надеваат на слично решение како во разговорите со нивните американски колеги.
Роснефт Дојчланд има удели во три локации: јужните рафинерии МиРо и Бајероил и објектот PCK во североисточниот град Шведт. Вкупно, трите објекти сочинуваат околу 12% од вкупниот капацитет за преработка на нафта во Германија, според нејзината веб-страница.
Секоја закана за иднината на рафинериите би можела да ја погоди стагнирачката економија на земјата, која веќе се бори со високите цени на енергијата.
Фајненшл тајмс објави дека рафинеријата во Шведт, која е поврзана со гасоводот Дружба, е особено загрижувачка.
Германија, која имаше силни долгорочни енергетски врски со Русија пред инвазијата на Украина, во последните години помина низ драстична промена на политиката, свртувајќи му грб на евтиниот руски гас.
Сепак, таа се воздржа од национализирање на средства во руска сопственост, како што е германската подружница на Роснефт, поради стравувањата дека Москва ќе возврати со преземање на германските бизниси во Русија.
Д. Мишев
