пишува: ВЕЛИН СТОЈАНОВСКИ
Во предвечерието на почетокот на школската година читам дека СОНК ќе штрајкува на првиот училиштен ден од оваа учебна година. Читам и не можам да поверувам дека тоа навистина ќе се случи. Почитувани просветители од СОНК, јас не можам да ве разберам, зарем вие, во чии раце и ум е образованието на нашите идни генерации, одлучивте да го уништите сонот за првиот училиштен ден на новите првачиња?
Не можам да ве разберам, затоа што додека вие, во овие доцни часови, мислите на зголемување на вашите финансии, во многу домови децата сонуваат за првиот училиштен ден. Ве молам, дали можете да ми кажете со што ви згрешија тие невини и недолжни мали деца за да им го уништите нивниот сон за кој со денови мечтаат?
Не знам дали вие се сеќавате на вашиот прв училиштен ден, но јас и после повеќе од половина век, сѐ уште добро го помнам моето прво влегување во големата училница и средбата со првиот учител и другарчињата со кои зачекоривме во полето по кое собиравме знаење. На тој пат, цели две декади поминав во школските клупи, ама првиот училиштен ден го помнам како што ги помнам и деновите кога завршував одреден степен на образование.
Јас го помнам првиот училиштен ден по средбата со вистински педагог кој на почетокот на првиот час нѐ научи да кажеме добро утро, а потоа ни рече: „од денес заедно ќе учиме да читаме, пишуваме и сметаме“. На крајот од денот, нè научи да си кажеме „довидување“.
Ќе ве молам, по што ќе го помнат првиот ден учениците кои утре ќе влезат во училница во која нема учител да им посака добредојде?
Секако дека ќе ве разберев своите барања за поголеми плати да го направевте во текот на летото со собири пред ресорното министерство или владата. Вака ме разочаравте и не само мене, верувајте, многумина се разочарани. За среќа, меѓу разочараните од постапката на СОНК има и многу просветни работници кои чесно и достоинствено ќе си го одработат првиот училиштен ден.
Наместо повикот за штрајк, колку поубаво ќе беше вие како синдикат да излезете со нови идеи и да ни кажете дека благодарение на синдикатот е направено подобрување на образовниот систем. Дека, токму вие од синдикатот предложивте, а министерството прифатило оценувањето во основно образование да се врши описно односно одреден ученик по одреден предмет наместо бројка да добие описно ги надминува стандардите или ги исполнува односно не ги исполнува стандардите од тој предмет.
Колку подобро ќе беше наместо овие нервози што ги предизвикавте кај родителите со играта „има штрајк – нема штрајк“ да им пратевте книга во која ќе стојат стандардите што очекувате дека нивното дете треба да ги исполни во текот на учебната година.
Сето тоа поделено по квартали и по предмети така да тие ќе знаат што треба нивното дете да научи во одреден период по одреден предмет. Сето тоа требаше да го подготвите и конечно да го вратиме образованието на вистински правец. Вака вие барате поголеми плати, а образованието да остане исто затоа што на вас ќе ви биде полесно ако нема стандарди и не се знае што треба да знаат учениците.
Токму од вас во синдикатот требаше да се покрене иницијатива за спроведување на таканаречениот ветинг и кај персоналот во образованието.
Наместо заклучок, би сакал со вас од СОНК да споделам едно пријатно искуство што го имав при посета на едно училиште во една западна држава, каде што образованието е рангирано многу повисоко од нашето. Во тоа училиште, наставниците не ги чекаат учениците во училница туку ги прифаќаат од автомобилите на родителите и ги водат до влезот. Еден ден, врнеше толку силно, а наставниците предводени од директорот на училиштето, ги прифаќаа децата, ги засолнуваа под нивните чадори и ги водеа до влезот.
Кај нас учителите и директорите во такви услови си седат во канцелариите, пијат кафе и се жалат на условите за работа.
За малку ќе заборавев да ви кажам, таму учениците се во училиштето од 08.30 до 16.00 часот, а кај нас и самите знаете дека имаат само по четири часа настава.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.