Што е тоа што ги тера младите да си ги одземаат животите едни на други?
Секој родител размислува како да му го пополни времето на своето дете. Освен обврските на училиште, го запишува на курс по странски јазик, го запишува на курс за креативни вештини, играорна, музичко, информатика, спорт итн. Сето тоа во зависност од афинитетите на детето. Секој родител кој е фан на некој спортски клуб сонува да го носи своето дете на спортски натпревар. Јас не. Јас одамна сум се откажал од гледање спортски натпревари на стадионите во Македонија, уште деведесеттите години кога случајно со другарите наидовме на навивачка група среде плоштад, кои скандираа навредливи зборови за мојот етникум и религија. Таа навреда предизвика револт, но не и желба за одмазда, не и да отидам во спротивната навивачка група па да им се изнапцујам се’ живо и диво. Напротив, се откажав од сите нив!
Кај нас, но и во регионот, постојат пореметени вредности во однос на тоа прашање. Навивачките групи на спортски натпревари скандираат говор на омраза, а говорот на омраза, за жал води кон злосторство од омраза. Во Сараево не работи јавниот превоз кога се игра градското дерби, затоа што навивачите посегнуваат кон уништување на јавниот имот. Босанските Хрвати скандираат „нож, жица, Сребреница“, сакајќи да покажат колку се поголеми Хрвати од оние во Хрватска. Париз е демолиран од навивачите по победата на светското првенство. И да не набројувам. Не е прв пат, а посебно беше често во периодот на режимот, навивачките групи да се користат за предизвикување насилство, со цел остварување на некакви политички агенди. Истото не изостанува ни сега, опозицијата да манипулира со чувствата на семејството и на навивачката група чиј припадник бил настраданиот Никола.
Животот на секој човек е свет, како што се свети неговата чест, имот и семејство, и никој нема право своеволно да одзема туѓ живот. Сочувство до семејството и до неговите најблиски. Протестот е уставно загарантирано право. Вчера го гледав протестот за правда за Никола, предводен од отец Ивица. Коментарите кои ги слушнав, упатени до полицијата, не се разликуваат од скандирањата на насилните протести против менувањето на името. Отец Ивица успешно се обидуваше да ги смири, да ги надвика, да даде мирна конотација на протестот, како што заслужува еден ваков протест. Во еден момент, смирувајќи ги, рече: „И ние имаме одговорност и тие имаат одговорност, а најголема одговорност имаат политичарите.“ Се согласувам оче Ивица. Секоја функција сноси и тежина наречена одговорност. Но зависи во која насока и со која цел тоа се изјавува и што се мисли да се постигне со истото. Јас би оставил судството да се позанимава со политичарите кои креираат дестабилизации, како и со извршителите на истите. Процесите и за едните и за другите веќе се во тек. Ние немаме ни верски ни световен мандат да судиме никому. Но, имаме должност, без разлика дали сме верници или кој во што и да верува, да си ги преиспитуваме сопствените постапки.
Колкумина од нас ги повикувале навивачките групи по социјалните мрежи да се воздржат од скандирањата полни со говор на омраза? Колкумина од нас седнале да разговараат со лидерите на навивачките групи со цел да ги смират страстите? Колкумина од нас се обиделе да им објаснат на навивачките групи дека граѓаните се воздржуваат од носење на своите деца на спортски натпревари за да не слушаат такви скандирања? Колкумина од нас се обиделе да им објаснат на младите и на навивачките групи дека спортскиот терен не е поле за натпревар на политичките и националистичките идеологии меѓу граѓаните?
Еве предизвик за невладините организации кои што се занимаваат со мировни проекти, седнете ги младите од различните навивачки групи, одиграјте еден пријателски натпревар на неутрален терен, не со топка, туку со зборови. Разбудете ја човечноста кај младите, објаснете им дека секој од нас е човек од крв и месо, без разлика на етничката, верската, политичката или клупската определба. Објаснете им дека секоја навреда исто боли, некогаш повеќе и од физички удар и дека секоја мајка исто плаче за своето чедо. Објаснете им дека спортот обединува и дека единствената нивна пресметка со спротивната навивачка група е само победата на тимот кој најдобро ќе биде бодрен додека игра. Сето тоа нека резултира со подадена рака, со помирување, взаемно покајание и прошка, и секако, предлог за кодекс меѓу навивачките групи. Да се договорат, да го потпишат и со сите сили да се борат да го почитуваат. Тоа би донело траен мир меѓу граѓаните, би ги заштитило навивачките групи од политички манипулации, би ги вратило родителите и децата на трибините, а пред се’ би ги заштитиле честа и животот едни на други.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.