„Процесите кои предизвикуваат некакви политички триења, почнувајќи од изборниот список и така натаму, може да предизвикаат безбедносни проблеми за време на изборите“, смета професорот Трпе Стојановски од Факултетот за безбедност во Скопје, кога станува збор за општествено-политичкиот момент во кој се наоѓа земјата. Стојановски смета дека Македонија ќе одговори на предизвиците со кои што ќе се соочат безбедносните институции при редовните претседателски и евентуалните предвремени парламентарни избори.
ЦИВИЛ Медиа: Професоре Стојановски, ни претстојат претседателски избори и евентуално нови парламентарни избори. Каква е улогата на безбедносната заедница во овозможување на еден демократски амбиент и пред сè безбеден амбиент за гласање?
СТОЈАНОВСКИ: Македонија има голема традиција, богата традиција за изборите, кои што се случуваат кај нас, и најразлични искуства кои што се поврзани со изборните циклуси. Она што е научена лекција, и воопшто сега, кога што очекуваме да почнат преговорите со Европската унија, е дека било какви избори, претседателските се извесни, сите други не знам дали се потребни во овој момент, се предизвик во кој што Македонија мора да покаже висок степен на капацитет и потенцијал за одржување на квалитетни, праведни, законски изборни активности.
Ја спомнавте безбедносната заедница, и голем дел од задачите, имајќи го во предвид македонското искуство, се делегирани на неа. Она што, по мене, е позитивна страна е дека во изминатите години, со партнерство на бројни меѓународни организации се направени чекори кои што веќе се интегрирани во безбедносната заедница, иако поконкретно се фокусираме на Министерството за внатрешни работи, кое што е столбот и во корпусот на институции кои што се надлежни за безбедноста и воопшто, институција која што има и превентивни и кривично-правни механизми да се справува со евентуални девијации и деликти.
Сметам дека е направен значаен исчекор. Она што мене ми е познато е дека многу од овие механизми се интегрирани и тие се дел од секојдневното работење на МВР. Не само кога станува збор за изборните процеси, но и многу порано, се активираат и постојат како континуирани, но особено воочи на изборните процеси, обуки, тренинзи… Потсетувањето и на некој начин идентификување на улогата на полицијата, претпоставувам дека е подеднакво важно и за другите институции кои што имаат надлежност во безбедноста, е подигнато на ниво на највисок приоритет и тоа е претпоставка дека институциите кои што треба да обезбедат безбедност, да бидат сервис во сферата кога граѓаните очекуваат безбедност. Мислам дека ќе одговорат повторно на задачата која што е поставена пред нив.
Меѓутоа, индиректно, многу од процесите кои што се кај нас, особено кои што значат некакви политички триења, почнувајќи од изборниот список и така натаму, може да профилираат одредени проблеми и потешкотии кои што понатаму, ако ги проценуваме ризиците, може да доведат и до одредени нарушувања, кои што ќе ја тангираат безбедносната сфера. Безбедноста е прилично осетлива материја, најразлични можат да бидат нашите впечатоци и дефиниции за тоа што очекуваме од институциите надлежни во сферата на безбедноста, меѓутоа јас верувам дека, особено во овој општествено-политички момент, Република Македонија ќе одговори на предизвиците со кои што ќе се соочат безбедносните институции при реалните претседателски и евентуално други избори со кои што ќе биде соочена заедницата.
Игор К. Илиевски
Камера: Дехран Муратов
Фотографија: Ангела Петровска
Монтажа и обработка на текст: Биљана Јордановска
