Во скопската населба Тафталиџе, во Општина Карпош, денеска со почеток во 19 часот, на ул. „Варшавска“ бр. 19, на местото каде е предвидено да се изгради осумкатница, ќе се одржи собир на граѓани против урабнизирањето на населбата.
Од граѓанската иницијатива „Зелено Тафталиџе“ која се обидува да ги сочува зелените површини во општина Карпош и нормалниот квалитет на живот во населбата, со ставање крај на неконтролираното урбанизирање, велат дека во моментот, во изградба се над 25 повеќекатници во населбата Тафталиџе 1, без притоа да се земат предвид релевантните фактори, неопходни за непречено секојдневие на граѓаните.
„Безброј пати сме се јавиле директно во Општината за најразлични ‘контроверзни’ објекти и будно го следиме официјалниот веб-сајт на кој се споделуваат партиски содржини, наместо релевантни проекти. Поднесовме неколку петиции и најчесто сме игнорирани од одговорните вработени лица во Општината, вклучувајки ги и месните заедници и градежните инспекции, но и кога тоа не е случајот, најчесто не добиваме конкретен одговор, бидејќи и ретко кога го имаат“, изјави за ЦИВИЛ Медиа, Филип Самарџиев од иницијативата „Зелено Тафталиџе“.
Тој потенцира дека на нивните барања надлежните не реагирале, а тоа резултира со зголемување на бројот на нерегуларности при изведба на градежните и урбанистички планови од Општината.
„Стоп за урбаната мафија во Карпош! За иднината се работи!“ е повикот до сите жители на Карпош, да заземат став во одбрана од бетонот што ја задушува и уништува населбата.
„’Зелено Тафталиџе’ не претставува политичка организација, ниту пак сме невладина организација која е задолжена за ваков тип на собири, едноставно, ја репрезентираме желбата на граѓаните од населбата и се трудиме да зачуваме една здрава животна средина, со цел квалитетен и непречен живот за сите граѓани од Тафталиџе. Гласот на граѓаните е дефинитивно слушнат, меѓутоа тенденциозно игнориран од Општината како институција, а тоа мора да се промени“, ни рече Самарџиев.
Од иницијативата ги повикуваат граѓаните заеднички да се изборат против „Урбаната мафија во Карпош“, додека не стане предоцна да се реагира.
Биљана Јордановска
