Со оглед на тоа дека со години се провлекува прашањето околу тоа кое ливче е важечко, а кое не, па често имаме извештаи во кои еден избирачки одбор се изјаснил на еден начин за начинот на кој е пополнето гласачкото ливче, а друг избирачки одбор на сосема поинаков начин, важно е да потсетиме на правилата, објави ЦИВИЛ.
Организацијата ги потсетува избирачките одбори на едно добро познато и сè уште важечко упатство на Државната изборна комисија во кое стои дека „за важечко гласачко ливче се смета и она гласачко ливче од кое на сигурен и недвосмислен начин може да се утврди за која листа на кандидати избирачот гласал“.
Во продолжение го пренесуваме целото упатство од ДИК:
УПАТСТВО за важечки и неважечки гласачки ливчиња
1) Гласачкото ливче е важечко ако е во согласност со член 110 од Изборниот законик.
2) За важечко гласачко ливче се смета и она гласачко ливче од кое на сигурен и недвосмислен начин може да се утврди за која листа на кандидати избирачот гласал.
3) Гласачкото ливче е неважечко ако не е пополнето или има заокружено повеќе листи на кандидати или кандидат
- При утврдувањето на тоа што претставува „сигурен и недвосмислен начин,, треба да се појде од тоа на кој начин е пополнето гласачкото ливче, односно дека избирачот со заокружување јасно ја изразил волјата дека гласал само за една листа на кандидати или кандидат.
- Сигурен и недвосмислен начин на изразување на волјата на избирачите би претставувало гласачко ливче на кое избирачот, наместо редниот број пред подносителот на листата, го заокружил името и презимето на носителот на листата или симболот на подносителот на листата.
- Гласачкото ливче е неважечко доколку не е пополнето на начин предвиден со Изборниот законик, ако е прецртано делумно или целосно, ако се заокружени повеќе листи на кандидати, ако бројот на гласачкото ливче не е соодветен на бројот на гласачкото место каде се гласа, или ако гласачкото ливче нема печат на предната страна.
