Претседателот и потпретседателот на Унијата на европски федералисти, европратениците Брок и Ковачев, од АЛДЕ и од редовите на Европската народна партија (EPP), испратија писмо до лидерот на ВМРО-ДПМНЕ, Никола Груевски по повод „загрижувачки активности на организацијата ‘СОС – Стоп Операција Сорос’, кон Младите европски федералисти (JEF) во Македонија“.
Во писмото се вели:
„Драг господине Груевски,
Би сакале да ги свртиме Вашето внимание кон еден инцидент кој Вие можеби го сметате како изолиран случај, но испраќа загрижувачка порака за европски ориентираната иднина на ПЈР Македонија, како едни од најголемите поддржувачи на земјата за евентуално пристапување во Европската унија.
Во петокот, на 3-ти февруари 2017-та организацијата ‘СОС – Стоп Операција Сорос’, одржа прес-конференција за да ги нападне организациите за кои смета дека се штетни за националниот интерес на ПЈР Македонија. На наше големо изненадување, една од споменатите организациите е и Млади европски федералисти (ЏЕФ) Македонија. Говорникот на прес-конференцијата, г-дин Цветин Чилиманов, како што сме ние информирани, главен и одговорен уредник на владината Македонска информативна агенција, ги опиша ЏЕФ Македонија и генерално Европските федералисти, како контроверзна организација и ги етикетира нашите активности како „смртоносни и опасни“.
Ние сметаме дека е значајно да се потенцира дека ЏЕФ Европа и националниот огранок – ЏЕФ Македонија, се непартиски плуралистички младински организации кои работат во правец на слободна и обединета Европа, водена според принципите на демократијата и владеењето на правото, која се стреми да ги осигура мирот, просперитетот, безбедноста и правдата. ЏЕФ Европа и ЏЕФ Македонија, работат кон поголема интеграција ма ФИРОМ во европското семејство, што надежно ќе води кон евентуален статус на земја- членка. ЏЕФ Европа е младинска организација на Унијата на европски федералисти- УЕФ , каде што ние сме претседател и потпретседател.
Имајќи ја во предвид блискоста на лидерството на СОС со Владата на ПЈР Македонија и останатите неодамнешни изјави на владините политичари кои се однесуваа на таканаречената „десороизација“ на државата, ние сме загрижени за активностите на нашите локални групи и уште повеќе сме загрижени дека овие инциденти можат да водат кон впечатокот дека вредностите кои се поддржани од УЕФ и ЏЕФ, не ги споделува Владата на ФИРОМ.
Ние, во секој случај, имаме целосна доверба дека е во Ваша моќ да реагирате на овие напади против Европските федералисти во Вашата држава и да ги искористите инструментите кои ги имате на располагање за понатамошните активности на граѓанското општество во ФИРОМ во поддршка на заедничките европски вредности и цели.
Ние, како и ЏЕФ Европа и ЏЕФ Македонија, сме на Ваше располагање, доколку одлучите да преземете некоја од овие мерки во правец на конструктивен дијалог“.
Елмар Брок, претседател на Унијата на Европски федералисти
Д-р Андреј Ковачев, потпретседател на Унијата на Европски федералисти