ЦИВИЛ – Центар за слобода одржа работна средба во Куманово во рамки на проектот „Заедниците против насилниот екстремизам“ на која се дефинираа следните проектни активности.
Претставниците на училиштата, полицијата и општината разговараа за продолжување соработката во доменот на превенција од насилниот екстремизам преку мултидисциплинарен пристап и активно вклучување на младите.
Самите учесници имаа креативни идеи и решенија како да се организира еден мултимедијален настан што ќе ги пренесе главните пораки на проектот.
„Самиот проект остава простор за граѓански ангажман, едукација, менторство, партнерство и поддршка на институциите и на заедниците во овие напори за подобрување на комуникацијата меѓу сите засегнати страни. Една од целите на проектот е да воведе конкретни и мултидисциплинарни пристапи кон мобилизација, образование, едукација и зајакнување на заедниците на локално ниво за да можат да се спротивстават на тенденциите што се во доменот на насилниот екстремизам… Нашата борба е знаењето против незнаењето. Нашата борба е борба на позитивните, мирољубивите и креативните решенија наспроти агресивните и деструктивните тенденции“, изјави Џабир Дерала, претседател на ЦИВИЛ.
Од таму едно од идејните решенија што ги конципираа учесниците на настанот беше, преку креативни пораки што упатуваат на мир наспроти насилство, на почит кон различностите наспроти омразата, на еднаквост, солидарност и слобода да се надминат мотивите и потенцијалите за конфликти и радикализација кои, пак, најчесто се иницијална точка кај младите што подоцна прераснува во насилство.
„ЦИВИЛ е денеска во вистински момент во Куманово. Јас и Советот даваме поддршка за сите проекти, дури сме подготвени како општина во грантовите што ќе ги делиме за 2020 година да дадеме можност на што поголем број невладини организации да учествуваат во делот на меките мерки против насилниот екстремизам, со цел да создадеме едно здраво и похумано општество“ – изјави градоначалникот на Куманово, Максим Димитриевски.
Реализирањето на активностите веќе е во тек и се очекува главниот јавен настан да биде во втората половина на март.
На првата работна средба Општина Куманово потпиша Меморандум за партнерство и соработка со ЦИВИЛ со кој се обврзаа на заедничка соработка и партнерство во превенција од насилниот екстремизам.
Проектот „Заедниците против насилниот екстремизам“ ЦИВИЛ го спроведува со поддршка од Амбасадата на САД во Скопје од јуни 2018.
Биљана Јордановска
