Поддршка за добивање датум за почеток на преговорите на Република Северна Македонија со Европската Унија во октомври, искажала амбасадорката на Литванија, Раса Каириене на денешната средба со премиерот Зоран Заев.
На средбата, како што соопшти владината прес-служба, биле поздравени постигнувањата на Република Северна Македонија на планот на добрососедските односи, посебно преку постигнатиот Договор од Преспа, како и во делот на реформите.
Констатирано било дека нашата држава заслужува напредок во интеграциите, поради што Литванија е меѓу првите земји што го ратификуваа Протоколот за членство на Република Северна Македонија во НАТО. На средбата била изразена и поддршка за добивање датум за почеток на преговорите на нашата земја со ЕУ во октомври, со цел да се задржи мотивацијата на позитивни промени што се случуваат во државава, во клучните области важни за ЕУ.
– Даваат резултати реформите, за што има позитивни оценки во Извештајот на ЕУ, но се значајни и за граѓаните на нашата земја. Веќе имаме видливи резултати во борбата против корупцијата и во делот на зајакнувањето на правосудниот систем. Цениме дека е можно до декември нашата земја да биде полноправна членка на НАТО и дека во октомври ќе го добиеме заслужениот датум за почеток на преговорите со ЕУ, којшто ќе биде големо охрабрување за напредокот на Република Северна Македонија, но за европските перспективи на целиот регион, истакнал премиерот Заев.
Изразувајќи благодарност за пријателската и принципиелна поддршка од Литванија, Заев упатил покана за посета на литванскиот премиер на Република Северна Македонија.
На средбата биле потврдени пријателските односи помеѓу двете земји и била потенцирана поддршката од Литванија преку експерти во твининг програмите на ЕУ, што ќе продолжи и во иднина. Споделени биле искуства за резултатите од евроатлантските интеграции во Литванија изразени преку желбата на граѓаните да живеат и работат во својата родна земја, дури и со враќања од странство, поради отворените перспективи.
На состанокот, како што стои во соопштението, била изразена определба за развој на соработката помеѓу Република Северна Македонија и Република Литванија, во областа на економијата и туризмот, земјоделството, информациски технологии и биотехнологиите.
Соговорниците разговарале и за поттикнување поинтензивна соработка помеѓу бизнис коморите на двете држави и примена на позитивни искуства од Литванија применливи за нашата држава.