Парламентарни избори заедно со локални нема да има, порача премиерот Зоран Заев откако лидерот на ВМРО-ДПМНЕ, Христијан Мицкоски побара предвремени парламентарни избори за кои рече дека најдобар термин за одржување е заедно со локалните избори наесен.
Тој му порача на Мицкоски ако има мнозинство да го покаже, а не да лаже зашто внесување таква непредвидливост е лоша за економијата.
„Ја повикувам секоја партија која мисли дека треба да има предвремени парламентарни нека се изјасни јавно за тоа. Коалициските партнери се апсолутно на ставот дека треба да има редовни избори. Дојде време да се работи и да се сработи до крај, а не постојано да се оди на избори. Еве бевме на избори, прифативме, ја утврдивме евроатлантската агенда, и завршија изборите, и ВМРО-ДПМНЕ изгуби. И сега повторно да одиме на предвремени? Зошто? Затоа што така Мицкоски мисли? Не, нема причини зошто да одиме. Ако треба по сто пати да повторуваме за тоа, ќе повторуваме. Парламентарно мнозинство за одлука за предвремени парламентарни избори нема, ако го има бујрум господинот Мицкоски нека го покаже и нека ја донесат комплетно одлуката. Така да престане да закажува заради свои внатрепартиски потреби одредени нереални агенди затоа што тоа е неодговорно и влијае врз економијата“, изјави Заев.
Заев вели дека не стравува оти ќе го загуби мнозинството во парламентот, туку очекува тоа да расте бидејќи смета дека води исправни и европски политики, има искрени намери и работењето е транспарентно.
„Очекувам мнозинството да расте, немам стравови дека ќе се изгуби. Впрочем и 2,5 – 3 години истеравме мандат со мнозинство од 62, 63, 64, 65… Верувам дека имаме доволно стабилно мнозинство да носиме сериозни одлуки кои живот значат за граѓаните“, вели Заев.
Тој додаде дека редовни парламентарни избори ќе има во 2024 година.
