„Наша задача е да одиме напред. Да чекориме напред и јас верувам дека најбрзо можно ќе се создадат услови. Ние не се откажуваме и ќе продолжиме да работиме. Секако доаѓа период на празници и за време на тие денови веројатно ќе се намалат активностите, а после празниците повторно ќе работиме поинтензивно“, изјави денеска премиерот Заев одговорајќи на новинарско прашање да гo коментира последниот развој на настаните во врска со блокирањето на процесот на проширување на ЕУ.
„Сакам да ги коментирам реакциите на Словачка и Чешка. Драго ми е што сѐ уште има европско во Европската Унија. Ова го кажувам со доза на горчина затоа што ако некој заслужил да добие поддршка на следниот чекор на патот кон ЕУ, тоа е Република Северна Македонија. ЕУ најмалку што смее да направи е да ги изгуби европските вредности и принцип. Се надевам дека тој дух ЕУ ќе продолжи да го испраќа кон нас земјите кандидати за членство затоа што ние немаме друга алтернатива. Како што сум кажал и порано, се надевам дека ЕУ нема да го изгасне светлото во мракот за да не бидеме изгубени“, изјави Заев.
Таа водилка нашата мотивација и за реформите, вели Заев, и за да бидеме подобри граѓани, за да си ја европеизираме државата, да го средиме правосудниот систем, да имаме сила и енергија да градиме за нашите деца, за идните генерации, да го осовремениме здравството, да ја подобриме уште повеќе инфраструктурата.
