„Симболичното“ тргање, преку ноќ, на споменикот на Андон Лазов Јанев – Ќосето, крена доволно прашина во јавноста за повторно да се јават со закани и говор на омраза поддржувачите на претходната власт, која како дел од проектот „Скопје 2014“ го постави пред судовите во Скопје.
Споменикот беше донација од Здружението за духовно обединување на Сетинци, Попадинци и Крушоради од Лерин, кои парите за своите проекти редовно ги добиваа од претходната Влада.
На својот фејсбук профил став за одлуката за тргање Ќосето имаше и Катерина Цаневска, потпарол на Општина Центар.
„Прв падна Касапот. Спомен обележјето на Ќосето, кое намерно ноќе во 2014 година, беше поставено пред судот како силеџиска порака дека претходната власт правдата ја дели со нож во рака, замина во некое депо. Центар и Град Скопје се ослободија од симболот на владеењето на ВМРО-ДПМНЕ на Груевски. Надлежните констатирале дека се работи за дивоградба“, напиша Цаневска на фејсбук.
„Јас секогаш на Фејсбук и Твитер ги изразувам своите ставови за настани што се случуваат и за кои мислам дека заслужуваат од секој граѓанин, интелектуалец, оној што размислува со своја глава коментар за одредена ситуација. Така беше и со тргањето на споменикот на Ќосето. Го напишав својот став и имаше реакции со закани, уцени… Денеска продолжија со уште подрски закани кон мене и кон моите деца“, изјави за ЦИВИЛ Медиа, Катерина Цаневска, сегашен потпарол на Општина Центар, како одговор на заканите што ги доби за нејзиниот Фејсбук статус.
Цаневска смета дека времето на едноумието и режимот не се минато и дека сè уште не се искоренети. Таа вели дека не бега од здраворазумска дебата и размена на мислења, но со име и презиме, а не преку закани и уцени со користење на анонимни профили. За неа тоа се кукавици и платеници.
„Можам да им порачам дека јас не молчев во времето кога името на Мијалков, Груевски и ВМРО не смееше да се спомене, нема да молчам и сега… Најстрашно е што повторно се мешаат деца и ми се закануваат користејќи ги моите деца“, вели Цаневска.
Ова не е прво нејзино рандеву со ваков начин на реакција за она што го работела претходно како новинарка во А1 и во МРТВ. Таа потсети на нејзината сторија со платата и пензијата на Михајло Маневски и за време на локалните избори во 2013 година кога ги снимала луѓето од Пустец, каде се соочила и со физички напад.
„Кога денеска ги вмешаа и моите деца се одлучив да ги пријавам, па да видиме кои се тие „големите“ мажи што се закануваат преку деца“, рече Цаневска.
Според последните информации од Министерството за внатрешни работи, од почетокот на месец февруари, документирани и процесуирани се 30 приговори во кои преку социјалните мрежи на носители на државни функции им била загрозена сигурноста или биле злоупотребени нивните лични податоци.
Од МВР се очекува одговор колку вкупно пријави на говор на омраза и закани преку социјални мрежи се досатавени до нив, вклучително и овие до државните функционери, дали следат случаи по дојава и колку од сучаите се процесуирани.
Биљана Јордановска