Косовските власти, по бројните реакции од домашните српски, но и на меѓународните фактори, ги прекинаа работите на изградбата на патот од Дечани до местото Плав во Црна Гора, кој треба да поминува низ заштитената зона на манастирот во Дечани, јави дописникот на МИА од Приштина.
По започнувањето на градежните работите реагираа Српската православна црква и партијата Српска листа, по што уследи и реакција на Мисијата на ОБСЕ во Косово.
– Го следиме со загриженост она што се чини дека е незаконско градење на пат внатре во Посебната заштитена зона (СПЗ) на манастирот во Дечани. Ја поздравуваме денешната одлука за запирање на работите во СПЗ. Набљудувачката мисија на ОБСЕ потврдува дека работите на патот попладнево се запрени и тешката машинерија е повлечена од СПЗ, соопшти ОБСЕ.
Американскиот амбасадор во Косово Грег Делави исто така го поддржа прекинувањето на работите.
– САД целосно се согласуваат со изјавата на ОБСЕ, напиша Делави на Твитер.
По прекинувањето на работите на патот Дечани-Плав се огласи и Рашко-призренската Епархија на СПЦ.
– Благодарение на низа меѓународни иницијативи во текот на денот косовските власти престанаа со незаконските работи на патот во заштитената зона на манастирот Дечани и тешката машинерија е наводно повлечена. Се надеваме дека косовските власти во иднина ќе го почитуваат своето законодавство и меѓународните обврски, се вели во соопштението на Епархијата.
