Советот на Агенцијата за медиуми и аудиовизуелни медиумски услуги (АВМУ) на денешната седница едногласно донесе решение за запирање на постапката за утврдување на постоење недозволена медиумска концентрација кај ТРД 24 ВЕСТИ ДООЕЛ Штип.
По образложението од стручните служби на АВМУ, членовите на Советот констатираа дека нема законска основа за недозволена медиумска концентрација.
Постапката беше покрената на седницата на Советот на 22 февруари годинава по поднесено барање од заинтересирана странка да се испитаат сознанија врз основа на интервју на сопственикот на операторот „Роби“.
Како што појаснија на седницата претставници на стручните служби на АВМУ, иако дел од изјавите упатувале дека постои поврзаност на операторот со радиодифузерот. Агенцијата побарала податоци од УЈП дали во периодот од 2013 до 2017 година се евидентирани позајмици кон ТВ 24 вести. Од УЈП, како што беше наведено, одговориле дека врз основа на контролата кај овој даночниот обврзник утврдиле оти немало позајмици во 2013, 2014 и 2015 година. Позајмици имало во 2016 и 2017 година, но во моментот на надзорот биле вратени.
Во решението за прекинување на постапката АВМУ ја зема предвид и завршната сметка на операторот за минатата година со која не биле утврдени побарувања и обврски помеѓу операторот и радиодифузерот, како и изјавата од управителот дека не постои медиумска концентрација и оти во 2017 година приходот за емитување рекламни спотови за операторот кој го остварила телевизијата врз основа на издадени фактури е 6,5 отсто од вкупниот приход.
– Податоците покажуваат дека ниту едно од физичките и правни лица кои се основачи и управители на радиодифузерот не се јавуваат како основач или управител на други правни лица трговски друштва во Македонија, наведоа на седницата стручните служби на АВМУ.
Извор: МИА
