Во новиот владин состав предложен од мандатарот Христијан Мицкоски ќе има 20 мажи и само три жени. Просечната возраст на членовите на владата е 47 години. Најстариот има 66 години, а најмладиот 33.
Ова е една од владите со најмногу членови од осамостојувањето на државата, а со најмал број на жени кои ќе предводат некое од министерствата.
„При изборот на кадровскиот потенцијал и решенија за состав на новата влада се водев од принципите за чесност, и посветеност, да бидат луѓе кои ќе дадат голема енергија во процесите и целосно ќе се вложат за реализација на амбициозните зацртани цели. Го немаме луксузот да не се успее“, рече мандатарот Мицкоски за време на претставување на предлозите за министри од ВМРО-ДПМНЕ и коалицијата.
Дали ова значи дека во владејачката коалиција нема доволно жени кои се чесни, работливи, енергични и амбициозни?
Од друга страна, новоизбраната претседателка на Северна Македонија, Гордана Силјановска-Давкова, која беше поддржана на изборите од ВМРО-ДПМНЕ, во својот говор за време на инаугурацијата во Собранието изрази надеж дека бројот на жените во новата влада ќе биде поголем од 42 процента.
„Јас не го знам соодносот на жените и мажите во следниот пратенички состав, но многу би сакала да направиме чекор напред во оние 42 проценти. Не случајно држава е во женски род, политика е во женски род, демократија е во женски род, Македонија е во женски род. Помогнете им, пратеници, витези, на жените да го изразат тоа што го имаат, а што не можеле досега“, истакна таа во инаугуративниот говор пред пратениците и гостите на 12 мај.
За жал, не само што не е направен чекор напред, туку овојпат нивниот број изнесува 13 отсто.
Но, и Силјановска-Давкова, која ги глорифицираше жените во својот говор, при кадровските промени во својот кабинет за генерален секретар и негов заменик постави двајца мажи.
Сето ова ја става жената на пониска стартна позиција во политичкото позиционирање и во очите на јавноста ја претставува како помалку успешна, помалку способна, помалку стручна, и пред сѐ, пониско ја вреднува како можен раководен кадар.
Г. Т.
ЦИВИЛ МЕДИА
