пишува: ВЕЛИН СТОЈАНОВСКИ
По десетте позитивни препораки на Европската комисија сите ние со голем оптимизам го чекавме состанокот на Европскиот Совет, на кој лидерите на земјите членки на ЕУ треба да одлучат дали нашата држава ќе добие датум за почеток на преговорите за членство во унијата.
По првиот работен ден од состанокот и негативните сигнали оптимизмот стивнува, но, останува надежта дека до крајот на денешниот ден ќе имаме конечно датум за почеток преговорите.
Лично сметам дека точен датум нема да добиеме. Силниот позитивниот сигнал кој најверојатно ќе биде формулиран во стилот дека со денот на усвојување на новата методологија за прием на нови членки, ЕУ ќе ги започне преговорите со земјите кандидати. Со што практично датумот се одлага за првата половина од следната година.
Ваквата формулација, или било која друга одлука, без конкретен датум ќе предизвика жешка политичка есен исполнета со барања за превремени избори и препукување помеѓу партиите кој колку сработил и кој е виновен што не добивме конкретен датум.
За жал, и процесот на ратификација на протоколот за членство за НАТО нема да биде завршен до НАТО самитот во Лондон планиран за почетокот на декември со што и нашето заслужено членство во алијансата ќе се одложи до крајот на март или почетокот на април следната година.
Тоа уште повеќе ќе го разбранува политичкиот амбиент во државава.
За среќа пролетта брзо ќе стаса и за седумдесет и првиот роденден на НАТО нашето знаме ќе се крене пред седиштето на НАТО со што конечно ќе станеме триесетта членка на алијансата.
Живееме во поднебје кое низ историјата било буре барут. Со влезот во алијансата никогаш повеќе во ова поднебје нема да се зборува за војни и конфликти туку ќе се зборува за мирот, за заедничкиот живот, за среќата, за европските вредности, за инвестициите кои донеле благосостојба и ќе се раскажуваат впечатоците од патувањата низ целиот свет.
Знаеме дека НАТО не е само воена организација која го гарантира мирот туку и организација во која се градат демократските вредности, а тоа значи со влезот во НАТО институциите во државата мора да се трансформираат.
Со гарантираната безбедност и силни државни институции ќе се створи поволен амбиент за нови инвестиции и подобрување на стандардот на граѓаните.
До крајот на мај и почетокот на јуни наредната година институциите на ЕУ ќе ги направат своите анализи и трансформации и усвојат новата методологија за преговори со земјите кандидати. Практично денот кога ќе се усвои методологијата ќе биде датумот за почеток на преговорите кој ние толку долго го чекаме.
Затоа почитувани политичари смирете ја топката, поправете ја реториката, засукајте ги ракавите и работете во интерес на сите нас. Пролетта брзо ќе стаса со своите слатки плодови: членство во НАТО и почеток на преговорите за членство во ЕУ.
Јас би ве замолил никој од вас политичарите да не ги присвојува тие плодови само за себе и својата политичка гарнитура. Тоа е заслуга на сите, а пред се на граѓаните и слатката политичка пролет треба да донесе бенефит за нас граѓаните. Вие, политичарите секако си живеете во својот сладок свет на многу бенефиции, од кои никако не се откажувате.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
