Општина Шуто Оризари нема пари за подготовка и спроведување на локалните избори што треба да се одржат на 15 октомври оваа година, е одговорот што претседателот на Општинската изборна комисија, Фахри Сали, го добил од градоначалникот Елвис Бајрам и секретарот на општината, Аднан Мемед. Согласно член 88 став 4 од Изборниот законик обврска на општината е да обезбеди финансии, услови и простор за тековно работење на Општинската изборна комисија, но Сали за ЦИВИЛ Медиа вели дека тие воопшто не можат да ги извршуваат ниту основните технички и административни работи, бидејќи добиле само еден компјутер и принтер, а не можат да комуницираат бидејќи немат телефон, факс…
„Баравме основни услови за работа, но добивме само еден принтер и еден компјутер. ДИК испрати допис до општините дека треба да обезбедат услови и простор за тековната работа на ОИК и ние на тоа се повикавме кога баравме од општината средства за технички, административни и најважно финансиски средства за работа на ОИК и Изборачките одбори. Имавме и средба со градоначалникот на Шуто Оризари, но тој рече дека општината нема пари. Сега плаќаме од свој џеб, но некој треба да ни надомести“, вели за ЦИВИЛ Медиа, Фахри Сали, претседателот на ОИК, Шуто Оризари.
Од ДИК очекуваат податоците за тоа кои општини немаат пари да ги спроведат изборите да ги добијат до крајот на неделава.
Од ОИК Шуто Оризари, пак, алармираат итно да се најде решение бидејќи ќе се доведе во прашање изборниот процес и се жалат дека сè уште не им се исплатени парите за локалните избори во 2013 година.
Претседателот на ОИК во Шуто Оризари изјави дека им фали еден член и двајца заменици во составот на ОИК. Тој додава дека во два наврати го известил ДИК за ситуацијата, меѓутоа ДИК го одбил неговото барање за именување на нови членови во состав на ОИК Шуто Оризари.
Дехран Муратов
