На денешниот Совет на јавни обвинители е заклучено дека специјалните јавни обвинителки Катица Јанева и Фатиме Фетаи го прекршиле Етичкиот кодекс на јавните обвинители. Советот одлучил да даде препорака за промена на обвинителот во предметот за насилството извршено во Општина Центар, каде обвинет е експремиерот Никола Груевски.
„Катица Јанева и Фатиме Фетаи го прекршиле Етичкиот кодекс на јавните обвинители на Република Македонија. Дадовме препорака до јавниот обвинител дека ќе треба да ја разгледа можноста од определување на друг јавен обвинител за застапување на тој предмет. Се работи за оној предмет каде е обвинет поранешен премиер, заедно со други лица за кривично дело, мислам, насилство“, изјави претседателот на Советот, Петар Аневски.
На рочиштето за насилствата пред Општина Центар, кое се одржа на 22 февруари, судијката Татјана Михајлова ги казни по 2.000 евра обвинителките Јанева и Фетаи за „елементарно непочитување на судот“. Јанева и Фетаи ја обвинија судијката дека направила фалсификат во записникот од претходното рочиште.
Препораката на Советот на јавни обвинители до Јанева да ја „тргне“ Фетаи од предметот против обвинетите Груевски, Миле Јанакиески и останатите, не е обврзувачка за Специјалната јавна обвинителка.
Следното рочиште за овој случај е закажано за утре во Основниот суд Скопје 1.
