ВЕСТ НА ДЕНОТ: Партиските лидери денеска на координација кај Спасовски
Лидерите на СДСМ, ВМРО-ДПМНЕ, ДУИ, БЕСА, ДПА, Алијанса и Алтернатива денеска во 13 часот, како што најавија од Владата имаа координација со премиерот Оливер Спасовски во врска со реализација на владините мерки за справување со коронавирусот.
„Нема поважна работа од здравјето на граѓаните. И во таа насока побарав согласност која беше прифатена дека е неопходно сите да покажат одговорност и да се однесуваат одговорно“, изјави техничкиот премиер Оливер Спасовски, по средбата.
На средбата, посочи Спасовски, со министерот за здравство Венко Филипче информирале детално за некои аспекти на преземените мерки и активности, а биле разгледани и сите опции за можен иден развој на настаните и за одговорите за сите тие настани.
Спасовски нагласи дека сите треба да покажат одговорност во ситуацијата, вклучувајќи го и приватниот сектор.
„Нема ништо поважно од здравјето на граѓаните, тоа значи и профитит не е поважен. Тој што мисли дека ќе профитира во вакви услови, нема успех“, нагласи Спасовски.
ИЗЈАВА НА ДЕНОТ: Заев: Здравјето на граѓаните пред се, политичките партии да бидат пример за почитување на препораките
Социјалдемократскиот сојуз ќе ги почитува препораките и мерките на Владата за справување со коронавирусот и своите предизборни активности ќе ги води преку медиумите, социјалните мрежи и преку лајфстримиг, порача денеска лидерот на партијата Зоран Заев по лидерската средба во Владата свикана на барање на премиерот Оливер Спасовски.
„Здравјето на граѓаните е највисок прироитет за сите институции и политички субјекти. Здравјето секому треба да му биде над се останато“, изјави Заев.
ФЛЕШ ВЕСТИ
Хронично болните пациенти за продолжување на нивната терапија ќе можат наместо кај лекар специјалист да одат кај матичниот лекар, како дополнителна мерка која нема да важи за новодијагностицираните пациенти.
*
Од деветтемина пациенти кои имат коронавирус и се хоспитализирани на Клиниката за инфективни болести, шест се во стабилна здравствена состојба, а кај тројца од нив има лесно влошување што значи имаат поотежнато дишење, но се уште не е потребна респираторна поддршка и се интензивира терапијата.
*
Педесет респираторни машини, дополнителна заштитна опрема, 1.000 нови тестови и два мобилни апарати за рендген снимање (со цел пациентите да не одат на Рендген институтот) ќе бидат набавени, изјави министерот Венко Филипче.
*
Следејќи ги препораките на Министерството за здравство, а со цел зголемена заштита на странките во постапките, Министерството за правда препорачува продолжување на судските постапки со зголемено ниво на претпазливост.
*
Координативното тело за изготвување и следење на имплементацијата на Националната стратегија за развој на концептот за едно општество и интеркултурализмот 2020-2022 при Влада на Република Северна Македонија склучи меморандум за соработка со Нансен дијалог центарот Скопје.
ЦИВИЛНИ ВЕСТИ
ЦИВИЛ ги повикува своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи. (ЛИНК ДО АПЛИКАЦИЈА)
Ангела Петровска
